Read zande Asanza 16 Bible Online

Asanza 16 - zande bible

Asanza 16

¹Gu mbakadapai du ku berã yo nga kina ga boro pai, ono gu karagapai nga ga mirãse si naye be Yekova.

²Agu apai dunduko nga ga boro si ni ziazia ha bangiri, ono Yekova nawisiga kina toro boro.

³Mo fú pa ga mangaapai kina ku be Yekova, gamo aberã adú ni nyakasinyakasi he.

⁴Yekova amangi ahe du tipa kina pa gaha sunge, na gbegberẽ boro a tipa rago fudifudipai.

⁵Agu aboro dunduko nakiisa pa tiyo nga kere gbegberẽ aboro bangiri Yekova; ni rengo, i agá nga zanga mbusa te.

⁶Inapai na rengo zeresi pa ngbanga irairapai, be gunde ti Yekova boro nane gbigbitapai ti ni.

⁷Ho ga boro apai nangba ni ti Yekova, ko nimoi avurani i sungu na ni zezeredi.

⁸Toni kumuko gbia kuti rurupai ngba ki susi, ti agu ahe naye ni bakere he tipa irairapai.

⁹Berã boro yo ni nasanga gani apai ni, ono Yekova naruga ba gani nduge.

¹⁰Sarangbanga ku sangba toro yo du ngba bakindo yo; ngbako ainga nga ndika rogo sarangbanga te.

¹¹Ruru ringbisahe na agu amarã ninaringbisa ahe du ni ga Yekova he; ringbisa baroãhe ku mangu yo du ni gako sunge.

¹²Si nga kere gbegberẽpai fu abakindo ka manga gbigbitapai, bambiko mbatabakindo du ni nyakasinyakasi he be rurupai.

¹³Gu ngbase nagumba rurupai si ngba ti bakindo, ko nakpi nyemu gu boro nagumba pai ni ruru he.

¹⁴Ga bakindo erã du wa baye na pa kpio kina boroboro fu ni, ono kina boro tatamana azéresa ha.

¹⁵Du ku bara bangiri bakindo zezeredi, si nga unga, gako ngbanya du wa gu dubo naye na bambata mai.

¹⁶Ka du na tatamana ngba ki susi ti bi dahabu; ka du na rugatinapai ngba ki susi ti sia feda.

¹⁷Gu bagene nga ga ruru boro naaria tihe ti gbigbitapai; gu ni nabanda gani pai ni nabanda kina ungani.

¹⁸Enda nangbe ku mbata yo fu gbarasapai, kiisapatise du mbata fu tigo.

¹⁹Gu pai ngba susi nga du na toro umbasitise fu rungorungo aboro, ti gu nga kparaka zizi ahe na aboro ruka.

²⁰Gu ni nagia pai ni abi wenepai, ngbarago du fu gu ni nakida kuti Yekova.

²¹I niya ti gu boro du tatamana kpotoni yo, boro rugatinapai nga ni, gu wene fugo du ngba boro nakiisa pa zomiapai.

²²Tatamana du wa gugaabi unga fu gu ni du he be ni, ono mungo du ni mbusa fu mumungo aboro.

²³Berã iratatamana naruga fugoni nzunzu, ki niyugu pa zomiapai fu ngbani.

²⁴Wene afugo du wa kina pepere anyege, ni nzinziri he fu mbisimo boro na wasa fu boroni.

²⁵Pai ho du ni ruru he bangiri boro, ono digidaha nga gene kpio.

²⁶Ga boro sunge gomoro nazingisa ni sa sunge, ngbani ki nizina he fu ni.

²⁷Gu boro are nga na pai ya nasanga gbigbita sangaapai, fugoni du wa we garã.

²⁸Keretukeretu boro nagbaraga kpata, bakusipai nakparaka dagba wene abadia.

²⁹Irazuu nagumba soki fu kurani ki ngbe mbata yo fu ni ku rogo gu pai angba nga ya.

³⁰Gu boro napira bangirini ti pai nasanga gbegberẽapai, gu ni nakisa ngbani naye na gbigbitapai.

³¹Nvue nga kpakpari taarimo fu boro; ni nibi he be kina gu pai nga ga rurupai.

³²Gu boro nga bayee ni tipa zinga ngba ki susi gu ni nga iraome, na gu ni naruga toroni ngba ki susi gu ni nadia bakporo.

³³I naba ake ku ri kpakpu mbosose, ono pa ruga paha dunduko ye be Yekova.