Read zande Asanza 17 Bible Online

Asanza 17 - zande bible

Asanza 17

¹Du na bete ugu riahe gbia kuti zereda si ngba ki susi ti kporo pumbo du na kina kpata rogo ho.

²Gu kanga namanga pai ni tatamana azóga wiri bairani, nga gu ni namanga kina pa zee, ni ki du na bete aũkumbo dagba awiri bairani a.

³Pere du tipa girisa feda, gbigiwi ki du tipa dahabu, ono Yekova nawisiga kpoto yo.

⁴Bamangi gbegberẽpai nadega tuni sa fugo irairapai; irazire naye tuni sa fugo pa biriki.

⁵Gu boro nawia rungorungo boro nafu zee fu kina Bamangini; gu ni du na ngbarago rago gberãngbi ni azanga nga mbusa te.

⁶Atita gbinza aboro nga gayo kpakpari irisa, ga agude taarimo nga abayo.

⁷Nonono betedi fugo angba nga ti gu boro zanga wene berã te; fugo irazire angba nga ti wiri bakindo a te.

⁸Marã mabirimo wa kikii pa mbia bangiri gu boro nafu he; yo ni nasa tini ku ho ni, ni niu au.

⁹Gu boro nadada tiandika nagbata nyemuse, ono gu ni nafuga kina gu pai kindi nakparaka wene badia.

¹⁰Zapai narima gbe kina ku kpoto gu ni yo du na rugatinapai ki susi amandoro 100 ti kpoto mumungo boro.

¹¹Gbigbita boro nagbata kina pa samungu, si du i akéda kina kere bandusunge fuo ni.

¹²Gbia boro gu nyarinde nga urisi rogo yo awiru be ru ngba ti gbia mumungo boro rogo gani mungo.

¹³Ka boro karaga gbigbitapai ku ba wenepai, gbigbitapai aguari nga kpuni te.

¹⁴Tonatona kpata wa ho boro nauka ime ni kpua; si du mo mbú pa ha mbata paa nikatona.

¹⁵Gu boro nadia pai ri gbegberẽ boro, na gu ni nakita ngbanga ruru boro, wa du yo ue, i nga kina kere gbegberẽ aboro bangiri Yekova.

¹⁶Tipagine ka marã du ti ni be mumungo boro ni ngbe tatamana na ni, wa adu nga ni na berã ti ni ya?

¹⁷Badia ngbanya nakpi nyemu badiani na arago dunduko, ono i avungu wirina tipa unda ni rago gberãngbi.

¹⁸Boro zanga wene berã nafu ngbaanga gbua, ki ye ka du tipa ga kurani pai.

¹⁹Gu boro nakpi nyemu pa samungu nakpi nyemu kpata a; gu ni nadua gani ngbadimo kporo ni gbanga ha nagbata gbarasapai.

²⁰Boro keretu berã au nga te, na gu ni du na gbegberẽ fugo ngbani yo ati ku rogo gberãngbi.

²¹Mumungo wiri boro du ni pa rungo fu bani; ba gu gude zanga wene berã, ngbarago ti ni te.

²²Wasawasa kpoto boro yo du wa wene ngua kaza, ono rungorungo toro naugusa ameme augusa.

²³Gbegberẽ boro nadia marã mabirimo ngbaduni yo ka aria pa ruru sarangbanga.

²⁴Boro rugatinapai naaria kpakpuni sa tatamana, ono bangiri mumungo boro du kina kuti digida kpotosende.

²⁵Mumungo wiri boro nga pa rungo fu bani ki du wa nirãnirã pai fu nani.

²⁶Ngba nga geda mbusa fu ruru boro te; ka ta weneringi boro ru nga ha a te.

²⁷Gu boro naka na fugoni du na inahe, na gu ni du na bayee toro nga boro rugatinapai.

²⁸Zavura mumungo boro ho ni niongo ni, i ki ya ti ni iratatamana; ho ni nikisi ngbani ni, i naberã pa ni wa ngangarã boro.