Read zande Asanza 18 Bible Online

Asanza 18 - zande bible

Asanza 18

¹Gu ni nakpara tini nagbata kina gu pai ni akpi nyemu he, ka zinga kuti gu ba wenepai nga ga sarangbanga dunduko.

²Rago angba nga ti mumungo boro tipa rugatinapai te, ono tipa kina kusa gu pai dũ bangirini.

³Ho gbegberẽpai naye ni, pa payasi naye a, rogo wasiro yo gbarasarimo naye ni.

⁴Agu apai du ngba boro si wa kina dudungura aime; gugaabi tatamana du wa gu wiridi naba aba.

⁵Ka dia gbegberẽ boro ku gume, ngba nga ha te, watadu ka gbarasa ga ruru boro ruru sarangbanga fu ni.

⁶Ngba mumungo boro natona kangu, ngbani nayamba amandoro.

⁷Ngba mumungo boro nga gbarasi pa ni, ngbani du wa gbina tipa kina ni.

⁸Agu apai nga ga bakusipai du wa kina wesewese wiri ariahe; si nandu rogo apa boro vuni yo dũ.

⁹Gu ni du na nyomoro rogo gani sunge nga wirina gu ni nga bagbarasihe.

¹⁰Rimo Yekova nga nyanyaki tumbatumba gbata; ruru boro naora koyo ki du zezeredi.

¹¹Ga irakumuko kumuko nga gani nyanyaki bakporo, wa bagbanga ngapa bakporo nabanda gani berã.

¹²Mbata fu gberã boro, ngbaduni yo du na abiatise, ono umbasitise nidu mbata fu irisa.

¹³Ka boro karaga pai mbata fu gia pai, si nga pa mungo na zee fu ni.

¹⁴Toro boro nikahi pai rago kaza; ono toro rungo, da rengbe ka kpida pa ha?

¹⁵Berã ngangarã boro nabi inahe; tu iratatamana nagbata inahe a.

¹⁶Ga boro gamahe nambakada ba fu ni, ki kusi ni ku bangiri bakindigi aboro.

¹⁷Gu boro nagumba pa gani pai mbata, ni wiri kina ruru boro, daho gu kurani ka ye ni ka wisiga ni.

¹⁸Ba ake naza kangu ki nisari ngbanga dagba airaome.

¹⁹Gu wirina imi ngbaduni foro, si nga nyanyaki pai ka zungadi ni berewe, ono gu darã kangu re wa kina ngbongbo kisa ngbadimo bakporo.

²⁰Boro nambi be kina agu apai nakura ngbani yo; ni mbi be gu pai kusi ngbani.

²¹Kpio na unga kina rogo gu pai nga ga mirãse, agu yo nakpi nyemu he arí gaha zuzuhe.

²²Gu boro di de, ni bi wenepai, ni ngba bangiri Yekova a.

²³Rungorungo boro nazungadi pa pai, ono irakumuko nakaraga pai ni kina kere fugo.

²⁴Abadia nangahe kina ho nagbarasa abadiayo, ono kura badia boro kina ho ka ni kuti ni ki susi wirinani.