Read zande Asanza 19 Bible Online

Asanza 19 - zande bible

Asanza 19

¹Gu rungorungo boro nata rogo gani rurupai ngba ti gu ni nga boro gberãngbayo nga mumungo boro.

²Ngba nga ha fu boro ni du ni zangainahe te, na gu ni naipisa nduni, ni nainga ti gani gene.

³Ho ga boro pa mungo niye ni na ni sa gbarasapai, ngbaduni yo nizingi kuti Yekova.

⁴Kumuko naye na dungu vovo abadia, ono abadia rungorungo boro kpara tiyo ti ni.

⁵Irazire dezire azánga nga mbusa te, gu boro nagumba zire amérã nga be mbusa ha te.

⁶Dungu aboro nazungadi he tipa pa ngbanya be weneringi boro, aboro dunduko du ni badia gu ni nafu gamahe fu aboro.

⁷Awirina rungorungo boro dunduko nasoga ni; ga abadiani susi, nandu andu ti ni tuturũ! Ni nado fuo yo na fura, ono i ki nioro aora.

⁸Gu boro du na tatamana nakpi nyemu kina tini; gu ni naka kuti rugatinapai aú au.

⁹Irazire dezire azánga nga mbusa te, gu ni nagumba zire akpí akpi.

¹⁰Si arengba nga fu iramungo ka raka rogo wenepai te, si arengba nga fu kanga ni du ni bazogo wiri abakindo a te.

¹¹Wene berã namanga boro ni du ni bayee ni tipa zinga, ngba ha angba ti ni ka mbu pa tiandika.

¹²Ga bakindo zinga wa kina gbunga bahu, ono gani ngbanya du wa ndomo ku ri nvuo.

¹³Mumungo wiri boro nga pa gberãrago fu bani, ga dia kumba paa na ni du wa kina gu mai nana ana kindi.

¹⁴Kporo na aukumuko nga aúkumbo be abagude, ono gu dia kumba du na rugatinapai naye be Yekova.

¹⁵Nyomoro naba boro ku rogo ndundundu rame, ono mumungo boro ambú ambu be gomoro.

¹⁶Gu boro naka kuti ndika nabanda ungani; ono gu ni napayasi gani apai akpí akpi.

¹⁷Gu boro du na nunga rungorungo boro ti ni nafu he fu Yekova, tipa gani wene mangapai ko afú mosoro fu ni.

¹⁸Mo rúgu wiro kina ho du maabangirise ni; ka mo mói nga ngbaduro tipa gbarasa ni ya.

¹⁹Gu boro du na bakere erã, ni nikatumo mbusa ha; ono ka mo batasi ni, mo amánga ha amanga wo berewe.

²⁰Mo dége turo sa rugapai, ki idi pa rugute, mo ki du na tatamana ku mbata yo.

²¹Badungu sanga apai du ngbadu boro yo, ono kina gu rugapai nga ga Yekova ko anyákasa ha.

²²Gu pai i akpi nyemu he be boro nga, ni du ni irarengo, ono rungorungo boro ngba ki susi irazire.

²³Gunde ti Yekova nandu sa unga; gu ni du he be ni nasunga zezeredi; i abí nga ni na gbigbitapai te.

²⁴Iranyomoro nazoga beni kina ku kurungbu yo, ka ni aye nga na ni sa ngbani berewe ya.

²⁵Mo tá bapayasi boro, zangainahe awírika pa ngarã; mo rúgu kina boro rugatinapai, ni nikaina he.

²⁶Gu boro namanga zuu kuti bani ki nido nani ku sa yo, ni nga gu wiri boro namanga pa zee ki niye na gbarasarimo.

²⁷Ako wire, mo mbú gia pa rugute ka inga be kina agu apai nga ga inahe.

²⁸Gu dezire are nga na pai ya namoma ruru sarangbanga, ngba gbegberẽ boro nambifa irairapai.

²⁹Sarangbanga du ni mbakadimbakadi he tipa abapayasi aboro, na amandoro tipa gii airamungo yo.