Read zande Asanza 2 Bible Online

Asanza 2 - zande bible

Asanza 2

¹Ako wire, ka mo agia gimi apai ki niigi sangbare ku ngbaduro yo,

²ki ye turo sa pa tatamana nifu ngbaduro yo tipa rugatinapai;

³ii, ka mo akpara ku ari tipa inahe ki nitumba fugoro ku ari tipa rugatinapai,

⁴ka mo agbata ha wa feda ki nita tipa ha wa okooko ũkumuko;

⁵si du mo ka ruga tiro ti ni na pa gunde ti Yekova, ki bi gu inahe nga ga Mbori.

⁶Bambiko Yekova nafu tatamana; ngbako yo inahe nakura ni na rugatinapai;

⁷ko naiga ndikidi tatamana tipa ruru aboro; ko nga vurakube fu agu yo nata rogo rurupai,

⁸ki nibanda pa agene ruru sarangbanga, ki nibanda gu pai nga ga gako siasia aboro.

⁹Si du mo ka ruga tiro ti ni na rurupai na ruru sarangbanga, na pa du na apai rengbe arengba, na ti wene agene dunduko;

¹⁰bambiko tatamana aríma ku ngbaduro yo, inahe ki nidu ni ũngbarago fu mbisimoro;

¹¹sia pa pai abátasa ro; rugatinapai abánda ro;

¹²ka batasa ro ti gene gbigbitapai, na be agu aboro du na fugo nangahe ngbayo,

¹³nga agu yo mbu agene rurupai ka peka kina agu apai nga ga bitimo,

¹⁴nangi tipa manga gbigbitapai ki nidu na ngbarago rogo gu nangahe nga ga gbigbitapai;

¹⁵nga agu aboro du gayo apai ni iraira ha, i du na keretu rogo gayo apai.

¹⁶Mo abáta be kungba de, be gu kungba ri navuro ro a na gari wene fugo,

¹⁷nga gu ri mbu pa gari badia ngbanya paranga, bangiriri ki go ti ga gari Mbori ndika;

¹⁸bambiko gari kporo nandu sa kpio, gari agene sa kina kangba aboro;

¹⁹agu yo nandu koyo du ri ni i ayega nga berewe te, i ada nga berewe ti agene unga a te.

²⁰Si du mo apéka kina ga wene aboro pai ki nika kuti agene nga ga ruru yo.

²¹Bambiko ruru aboro aráka zegino, airarengo ki nye rogo ho;

²²ono i aróga gbegberẽ aboro ku sa yo zegino, agu yo namanga pai ni biriki i amófa yo amofa zegino.