Read zande Asanza 21 Bible Online

Asanza 21 - zande bible

Asanza 21

¹Ngbadu bakindo yo du wa wiridi ime be Yekova; ko nasa ha kina ku ho ko akpi nyemu ni.

²Ga boro apai dunduko bangirini ni kina ruru he, ono Yekova nawisiga kpoto yo.

³Ka manga rurupai na ruru sarangbanga ngba ti Yekova ki susi umotumo.

⁴Ngera enda na gu kpoto boro yo du na ruka, na we atara nga ga gbegberẽ boro, si nga ingapai.

⁵Gu berã pa pai nga ga ngangarã boro nandu sa pai kpaima, ono agu aboro dunduko namanga pai gburungagburunga nandu sa kina zingohe.

⁶Dia ũkumuko ni gu mirãse nagumba zire du wa gu utura yuge naya na ni, wa gbina sa kpio a.

⁷Kina gu zuu nga ga gbegberẽ aboro nikaroga yo ku sa yo, bambiko i ka pa manga rurupai.

⁸Gu gene nga ga boro bape du ni nuganuga ha, ono gu sino nga ga ziazia boro du ni ruru he.

⁹Sunga ti durugaduruga ri bambu yo ngba ki susi ti sunga na de sakapai rogo vuru bambu sa.

¹⁰Mbisimo gbegberẽ boro nakpi nyemu kina gbigbitapai; kurani nabi nga inapai ku bangirini yo te.

¹¹Ho i nimbusi bapayasi apai ni, si nimangi zanga inahe ni du ni iratatamana; ho i nirugu iratatamana ni, ni ki du na inahe.

¹²Ruru boro nakparia pa ku gbegberẽ boro; i bafu gbegberẽ aboro sa gbarasa yo.

¹³Gu boro nakisa tuni tipa gia kpe rungorungo boro, ni akpára a wo, ka i agia nga fugoni ya.

¹⁴Gamahe ni gbuko nazeresa zinga; na marã mabirimo ku ngbaduse yo nazeresa kere era.

¹⁵Ho i nisari ruru sarangbanga ni si nidu ni ngbarago fu ruru boro, ono si nidu ni ugunde fu amangi gbigbitapai.

¹⁶Gu boro namerã be rugatinapai asúnga kina dagba rimbasa kangba aboro yo.

¹⁷Gu boro nakpi nyemu kina gu pai ngba ti ni adú ni rungorungo boro; gu ni nakpi nyemu imekakue na nzeme adú nga na kumuko te.

¹⁸Gbegberẽ boro nga ũmotumo fu ruru boro, na irabiriki du ku ba ruru boro.

¹⁹Gu pai ngba ki susi nga sunga rogo ngbi ngume ti sunga na de sakapai nga gandaragandara de.

²⁰Kikiipa kumuko nanye dimo ku iratatamana yo, ono mumungo boro nanyasa gani anyasa du.

²¹Gu boro nagbata rurupai na weneringise abí unga na irisa.

²²Iratatamana nadakpa ti vuro pere ga airaome bakporo, ki bafu gu nyanyaki apai i nakida kuti ni.

²³Gu boro nabanda ngbani na mirãni nabanda tini be fudifudiapai.

²⁴Iraruka nga irakiisapatise, rimoni nga “Bapayasi pa apai,” namanga pai na enda ni dingidingi ngbaduse.

²⁵Gu nyemuhe nga ga iranyomoro naimo ni bambiko ni ka pa manga sunge ni beni.

²⁶Gbegberẽ boro nakpi he na aura na uru pitipiti, ono ruru boro nafu he ka ni aka nga na ni ya.

²⁷Ga gbegberẽ boro motumo nga kere gbegberẽ he; waĩ susi he ho ye ni ni na ni na gbegberẽ berã a?

²⁸Irazire dezire akpí akpi, ono gu pai nga ga gu boro nagia pai si nikanye.

²⁹Gbegberẽ boro na zee ti kpakpuni a te, ono ruru boro naruga gani apai.

³⁰Tatamana na rugatinapai na rugapai, si arengba nga na ru kuti Yekova te.

³¹I niima mbakada farasi tipa uru vura, ono diabese naye be Yekova.