Read zande Asanza 22 Bible Online

Asanza 22 - zande bible

Asanza 22

¹Ka sia wene rimo ngba ki susi ti sia bakere ũkumuko, ka ngba bangiri aboro ngba ki susi ti sia feda na dahabu.

²Irakumuko na rungorungo boro gbia tiyo wa sa; Yekova nga bamangi yo dunduko.

³Ngangarã boro nabi kere pai, ki gbu; ono zangainahe nandu andu kindi, ki bi mbusa tipa ha.

⁴Gu mosoro nga ga umbasitise na gunde ti Yekova nga aukumuko na irisa na unga.

⁵Akiwe na agbina du ngba gene airakeretu; gu boro nabanda tini ané he tuturu.

⁶Oni sónosi gude rogo gu pai ka ni ndu ngba ha, ho ni ka gbinza ni ka ni agúari nga ngba ha ya.

⁷Irakumuko nazoga rungorungo boro, gu ni nga badibape nga kanga fu bafubape.

⁸Gu boro du narũ irairapai aké gberãngbi, ono gani ngbondo zinga apaya apaya.

⁹Gu boro du na weneapai bangirini kpaima i afu maku afu fu ni, bambiko ni nakpara riahe dagba gani riahe yo fu rungorungo boro.

¹⁰Mo dó bapayasi pa apai ku zegi yo, fuo gure kangu ki go, ii, paa na wasiro ago a.

¹¹Gu boro nakpi nyemu du gigiri kpotoni yo, fugoni ki du na undahe, bakindo adú ni badiani.

¹²Bangiri Yekova nangera kuti inahe, ono ko nabafa agu apai nga ga irabiriki.

¹³Iranyomoro naya, “Bahu du zegi yo re! U aímo re kina ngba gene bakporo yo!”

¹⁴Ngba kungba de du wa dudungura due; gu ni zingi Yekova fu ni ati ati koyo.

¹⁵Mungo du ni vovo ho ku kpoto gude yo, ono ruga ni na kpudu adó mungo ti ni tuturu.

¹⁶Gu boro narungosi rungorungo boro ka kiisa gani kumuko, watadu fu he fu irakumuko, zingohe amánga ni amanga.

¹⁷Mo yé turo ka gia agu apai nga ga iratatamana, ki nimoi berãro sa gi inahe;

¹⁸bambiko si adú ni wenepai ka mo ka kuti ni ku kpotoro yo, ka si du ngbaro dunduko ni mbakadimbakadi he.

¹⁹Mi yugu he foro mo ini he kina areme, fu kina boro mo, ya mo nikída kina kuti Yekova.

²⁰Ati mi ake gumbaapai foro wa 30, nga ga arugute na inahe?

²¹ka yugo pa gu foro du ni ruru he na rengo, mo ki rengbe na karaga ndikidi pai fu agu yo nakedi ro.

²²Ka mo nidi nga ga rungorungo boro he, bambiko ni nga rungorungo boro ya, watadu turã gu rungosirungosi ni ngbadimo bakporo a ya;

²³bambiko Yekova azúngadi he tipa gayo pai ki gbarasi unga agu yo nagbarasa yo.

²⁴Ka mo nimángi nga badia ngbanya na gu boro inidi zinga ya, ka mo nitá nga na boro zinga a ya,

²⁵mo ka wirika gani apai, ki zi ti gbina.

²⁶Ka mo nidú nga dagba agu yo yo nakata ido ya, nga agu yo nadu ku ba ga akurayo abape.

²⁷Ka he adu nga bero ka tumo na ni ya, tipagine ka ni di ga barame ti ni tii ro ku sa yo?

²⁸Ka mo nigbísi nga kuru bangbanda kporo nga gu abamo amoi he ya.

²⁹Mo nabi gu boro namanga gani sunge na birĩ? kina ni nikaru ku bara bangiri abakindo; ni arú nga ku bara bangiri kungba aboro te.