Read zande Asanza 23 Bible Online

Asanza 23 - zande bible

Asanza 23

¹Ho mo ka sunga ni ka ri he na bazogo, mo kpária pa gu he nyanyaki du bara bangiro;

²ki zogo tiro yee, ka si du wa mo nga boro nyemu riahe gbe.

³Ka mo dú nga na nyemu gani bawene riahe ki susi ya, bambiko si nga gu riahe nananga boro ananga.

⁴Ka mo nifúdi nga tiro tipa du ni irakumuko ya; ono mo dú na tatamana rengbe na mbu pa ha.

⁵Bambiko ho bangiro nibi he ni, si niima go; bambiko aukumuko naga wa zire nizara puporu ka gu, wa dingimo nagu ku ari yo.

⁶Ka mo nirí nga gu riahe nga ga boro kere ngera ya; ka mo kpí nga nyemu gani bawene riahe a ya;

⁷bambiko wa du gani berã ku kpotoni yo, wo du ni, ni naya foro we “Mo ri he ki mbiri he!” ono ka kpotoni yo adu nga na mo ya.

⁸Gu bete riahe mo niri mo asúka ha asuka, ki gbarasi pa gamo wene apai.

⁹Ka mo nifúra nga ho ka mumungo boro gi he ni ya, bambiko ni apáyasi pa ga tatamana fugo.

¹⁰Ka mo nigbísi nga kuru bangbanda kporo ya, watadu ndu ku rogo ga awirinyaure aati yo a ya;

¹¹bambiko Batumoyo nga nyanyaki boro; ko azúngadi he tipa gayo pai kuti ro.

¹²Mo moi berãro tipa rugute, na turo sa agu apai nga ga inahe.

¹³Ka mo mbú nga ruga gude ya; bambiko ka mo ta ni na kpudu, ni akpi nga te.

¹⁴Ono ka mo ta ni na kpudu mo abátasa toroni be Baatoro kpikpi aboro.

¹⁵Ako wire, ka kpotoro yo du na tatamana, kpotore yo adú na ngbarago a.

¹⁶Mbisimore angi a ho mo ka gumba ruru apai ni ni ngbaro.

¹⁷Ka mo nikpí nga aboro ingapai ku kpotoro yo ya, ono mo dú na gunde Yekova ti ro kindi na auru pitipiti.

¹⁸Ni rengo pai kina ku mbata yo, I adía nga ga maabangirise ku sa yo te.

¹⁹Ako wire, mo gí he, ki du ni iratatamana, ki nirugu berãro rogo pai.

²⁰Ka mo dú nga dagba abambiri imekakue yo ya, watadu dagba airaangbu abari pasio a ya;

²¹bambiko bakpiimekakue na iraangbu adá ti rungo, boro raturatu rame si aukadi ni na kina kpatakpata aroko.

²²Mo dége turo fu bamo navungu ro, ka mo nipáyasi nga namo ho ri nagbinza ni ya.

²³Mo ngbé rengo, ka mo bági nga ha ya; mo ngbé tatamana, na rugute, na rugatinapai a.

²⁴Ba ruru boro angi ni bakere he; gu ni batika tatamana gude adú na ngbarago tipa gani pai.

²⁵Mo ídi bamo na namo dú na ngbarago, na gu ri navungu ro ri ngí.

²⁶Ako wire, mo fú kpotoro yo fere, gimi apai ki ngba bangiro ki susi.

²⁷Bambiko debari du wa dudungura due; na kungba de wa fitikiri due.

²⁸Ri napi ka pida rago wa batuka, ki ningeesi airabiriki dagba aboro.

²⁹Ako, da du na ima? Da du na rungo? Da du na darãpai? Da nakpakana he? Da du na aoro zanga nduhe? Da bangirini azama?

³⁰Agu yo naima ku pati imekakue, agu yo nagbata kodikodi imekakue.

³¹Ka mo ngére nga ku rogo imekakue ho si nangbi ni, ki zamu ku inga yo ya, na ho si nangba ni gose yo ya.

³²Ti digidaha si ade boro wa wo, egetere he ki du wa ga kpokowo.

³³Bangiro abí mbisimo iiriwo apai, ga berã agúmba apai ni biriki.

³⁴Mo adú wa gu ni pi bebere baime tikpo yo, watadu wa gu ni napi ri dangba kurungba.

³⁵Mo ayá, “I yawa re, ono mi aima nga te; i nari re, ka mi aina nga ha ya. Ni gini rago mi akazinga rame yo? Mi agbáta kura mbirimbiri he berewe.”