Read zande Asanza 24 Bible Online

Asanza 24 - zande bible

Asanza 24

¹Ka mo nikpí nga pa ga gbigbita aboro pai ya, ka mo nikpí nga nyemu ka du na yo a ya;

²bambiko gayo berã nasanga pa zuu, ngbayo nagumba fudifudipai.

³Boro nidua bambu be tatamana, ni ki nyakasi he be rugatinapai;

⁴be inahe ni nihisi avuru bambu yo ti ni, na kikiipa wene ahe dunduko ngba angba nga ga aukumuko.

⁵Boro tatamana du na ome; na irainahe nakiisa tandu;

⁶bambiko mbiko tatamana ruga ro si mo ka so ga vura ti ni nzunzu, mbiko rimbasa aboro rondo, yo du diabese ni.

⁷Turú tatamana aturã ki susi fu mumungo boro; ni aza nga ngbani bangbanga bakporo yo a te.

⁸Gu boro naberã pa sanga gbigbitapai, aboro ayá ti ni ni nga basangi biriki.

⁹Berã pa manga mumungo pai nga ingapai, ono bapayasi aboro nga kere gbegberẽ boro bangiri aboro.

¹⁰Ka he amaka ro ti uru gberãngbi, omero adu toni gbua.

¹¹Mo bátasi agu yo i andu na yo sa kpio; mo ká na agu yo i naima ringbisa yo sa imo yo.

¹²Ka mo ya, “Mo ngére, ani aina nga pa gi te re,” gu ko ninawisiga kpoto yo aina nga pa ha te? Na gu ko ninabanda tororo ko aina nga pa ha a te; Ati ko afú mosoro fu aboro rengbe na kina gayo mangaapai?

¹³Ako wire, mo ri nzeme anyege, bambiko si nga wene he, na gu natoga ti pepere anyege, du ni nzinziri he ngbaro.

¹⁴Mo aina ha ya kina wo du tatamana fu mbisimoro; ka mo bi he, wenepai adú foro ku mbata yo, i adía nga ga maabangirise ku sa yo te.

¹⁵Ka mo nipídi nga ga ruru boro kporo wa gbegberẽ boro ya; ka mo nigbárasi nga gani kporo ni zuu ya;

¹⁶bambiko ruru boro nati bara saba, ki niguari berewe; ono gbegberẽ aboro nitiwi atiwa be gberãngbi.

¹⁷Ka mo ngí nga ho vuraro niti ni ya, ka kpotoro yo awása nga ho ni nakotoka ni a ya;

¹⁸Yekova ka bi he, si ki gberẽ ti ko, ko ki di gako zinga ti ni ku sa yo.

¹⁹Ka mo nifúdi nga tiro bambiko amangi gbigbitapai ya, ka mo akpi nga ga gbegberẽ aboro apai a ya;

²⁰bambiko wenepai adú nga fu gbigbita boro ku mbata yo te; ga gbegberẽ boro we atara abísa abisa.

²¹Ako wire, mo gúnde ti Yekova na be bakindo a, ka mo kpámia nga tiro na agu yo inidi pa satise a ya;

²²bambiko gberãngbi akúra be yo rure; da ini pa gu gbarasahe nikaye be yo wa du yo ue?

²³Agi apai re a nga fugo airatatamana. Kpara pa boro rogo sarangbanga nangba nga te.

²⁴Gu ni naya fu gbegberẽ boro wẽ, “Mo nga boro wenesa,” aboro atiwa ni, arikaaboro ki nisogo ni;

²⁵ono agu yo naza gbegberẽ aboro adú na ngbarago, wene maku ki du ku ri yo.

²⁶Gu boro nakaraga ruru karagapai nanyora ngba boro.

²⁷Mo mbákadi pa ga sunge zegi yo, ki mbakadi pai tipa ro ati yo; fuo gure mo ki dua ga bambu.

²⁸Ka mo dú nga ni dezire kuti kuaro zanga nduhe ya, ka mo nángi nga he ni ngbaro ya.

²⁹Ka mo yá nga “Mi amánga fu ni a wa ni amangi he fere; mi agása he fu boro rengbe na gani sunge,” a ya.

³⁰Mi asusi pati ga iramungo ati, pati ati bakakue nga ga gu boro zanga wene berã;

³¹mo ngére, akiwe asono asona ri he dú; abagambu ki di he, gu ngapa mbia nadu pati he kirikiri akuadi ku sande.

³²Mi abi he ki berẽ pa ha wenengaĩ; mi angere, si ki yugu pai fere.

³³Wiri rame toni, yukura toni a, uya be a toni ka ongoda,

³⁴si du rungo ayé ku ri ro wa batuka, ga zingoahe wa boro vura.