Read zande Asanza 25 Bible Online

Asanza 25 - zande bible

Asanza 25

¹Agi asanza re, ga Soromo du, nga gu avuru Izikiya ake he berewe nangia bakindo aYudo.

²Si nga ga Mbori taarimo ka oka pai, ono gu taarimo nga ga abakindo nga ka gbata ndu apai.

³Wa du angbangbaturũ ni tuturu he, na kpotosende ni badudungura ha, wo ka i awisiga nga kpoto bakindo yo a ya.

⁴Ka i rogo gai feda ku sa yo, wene he nye anye be pangu tipa úsunge;

⁵ka i di gbegberẽ boro ku sa yo bara bangiri bakindo, gako mbatabakindo adú ni nyakasinyakasi he be rurupai.

⁶Ka mo nimói nga tiro ku mbata yo bara bangiri bakindo ya, ka mo nirú nga rogo ba bakindigi aboro a ya;

⁷bambiko si ngba i ya foro, “Mo yé ku mbata no,” ti maa yo ro ku sa yo ku bangiri bazogo. Gu pai mo nibi ni bangiro

⁸ka mo ndú nga na ni ku bangbanga yo ni ipo ya; bambiko mo amánga waĩ ti digida ha, ho kuaro ka fu pa zee ni foro?

⁹Mo sáki ga ngbanga dagba ro na kuaro, ka mo kúsi nga okooko pai nga ga kura boro ya;

¹⁰gu boro ka gia ha ki ye na pa zee ku ri ro, ka ga wasiro adiga nga ya.

¹¹Gu pai rengbe gumba yo ho ni karagapai si du wa kina zuzu ngua wa dahabu rogo baga feda yo.

¹²Wa tongo dahabu, na wene fongo nga ga kikiipa dahabu, wo du tatamana barugupai fu agu yo nadega tuyo sa ni.

¹³Wa gu zere morogumba nidu ti regbo ke ahe, wo du irarengo mokedi fu gu ni nakedi ni, bambiko ni nafu wasa fu toro bairani.

¹⁴Wa dubo na yuge zanga mai wo du gu ni naabia tini na zire tipa agu ahe ni agama nga ha ya.

¹⁵I nazungadi bazogo na hipai ni idi pai, gu mirãse nagumba zezeredi pai nakua meme.

¹⁶Ka mo bi nzeme anyege, mo ri he rengbe arengba, mo ka mbi be he ki suku he asuka du.

¹⁷Ka mo nindú nga dedede ku kuaro yo ya, ni ka mbu be ro, ki tona soga ro.

¹⁸Gu boro du ni dezire ni zire kuti kurani ni wa ngbondo vura, watadu basape, watadu tĩtĩ guanza.

¹⁹Kida kuti irazanga pa rengo ti rago fudifudipai du wa kina gbegberẽ rinde, watadu wa gu ndue zutuka ti ngba zunga ha.

²⁰Gu boro nabi bia fu gu ni du na rungo kpotoni yo, du wa gu boro naura roko ti kpotoni ti rago zere, wa kakaĩ imekakue ti bangiri oro.

²¹Ka vuraro du na gomoro, mo fú riahe afu fu ni ni ri he; ka ni du na gomoro ime, mo ki fu ime fu ni ni mbiri he;

²²si mo ka ba guta mbusa ti ni ku ri ni, Yekova nikafu mosoro foro.

²³Wa yuge nodi naye na mai; wo du gu mirãse naso kpekpe, naye na ndukuda kpakpuse.

²⁴Sunga ti durugaduruga ri bambu yo ngba ki susi ti sunga na de sakapai rogo vuru bambu sa.

²⁵Wa dododo ime fu gu boro du na gomoro ime, wo du gu wene pangbanga naye gii ngbi yo.

²⁶Wa rufuduru ime, watadu gbegberẽ gugaabi, wo du gu ruru boro nambu gene gu gbegberẽ boro.

²⁷Ngba nga ha ka ri nzeme anyege ni bakere he te, si du gbata boro kina pa gani taarimo angba nga te.

²⁸Gu boro aruga nga tini ya, du wa kina gu bakporo kuadi yo ngapa ha, zanga ndugu.