Read zande Asanza 26 Bible Online

Asanza 26 - zande bible

Asanza 26

¹Wa morogumba kita, watadu mai ti regbo ke ahe, wo irisa arengba nga fu mumungo boro ya.

²Wa bavurukporo rago gau ta, wa mbirambira rago gu u, wo du gu motiwa zanga nduhe adu nga na imaha ti ni ya.

³Giri dupo tipa farasi, marã rugangba tipa dongi, kpudu tipa gii mumungo aboro yo.

⁴Ka mo káraga nga pai fu mumungo boro kuti sangba gani pa mungo ya, mo ka du wa kina ni a.

⁵Ono mo káraga pai fu mumungo boro kina kuti gani fugo mungo, ni ka du ni iratatamana bangirini.

⁶Gu boro nakeda pai be mumungo boro nakata kina nduni ku sa yo, ki bi rungo.

⁷Wa agu andu gbarĩgbarĩ boro naba aba remereme, wo du sanza ku ngba mumungo aboro.

⁸Wa gu boro navo mbia ku barioko yo wo du gu ni nafu irisa fu mumungo aboro.

⁹Wa gu kiwe kiti ku be bakpi imekakue yo wo du sanza ku ngba mumungo aboro.

¹⁰Wa ba baaguanza nahoga aboro dunduko wo du gu ni nangbe mumungo boro tipa sunge, watadu bakpi imekakue.

¹¹Wa ango nakaraga tiru berewe sa gu he suku u he wo du gu mumungo boro nimangi gu pai ki mangi kina ha berewe.

¹²Mo bi gu boro du ni iratatamana bangirini? Maabangirise du tipa mumungo boro ki susi ni.

¹³Ya iranyomoro wẽ, “Bahu du gene yo! Bahu du gene bakporo yo!”

¹⁴Wa kpuguru nasa tihe ti amarãha, wo iranyomoro nasaka tini ri gani barame.

¹⁵Iranyomoro nizogo beni ku kurungbu yo; ni nambu ambu ka ye na beni sa ngbani berewe.

¹⁶Iranyomoro bangirini ni iratatamana ki susi aboro saba nga agu yo rengbe ka karaga pai ni rugatinapai.

¹⁷Gu boro nati ku rogo paa adu nga ni gani pai ya, du wa kina gu boro nazia ango ti aturu.

¹⁸Wa irapupo nabafa agburuka we, na aguanza, na kpio,

¹⁹wo du gu boro nananga kurani, ki ya, “Mi namanga ha ni kina pa mbaro!”

²⁰Be zingo nyake we nabisa ti ni; ho adu nga bakusipai ni ya, paa nyasi.

²¹Wa kingire ti kingiri we, wa nyake ti we; wo irapa paa nazingisa kpata.

²²Agu apai nga ga bakusipai du wa kina mbusuru bawene ariahe; si dunduko nandu ku rogo apa boro vuni yo.

²³Biriki ku ngba boro na gbegberẽ ngbadu boro yo du wa gbegbe feda i nimbedi kpoto akoro nani.

²⁴Gu boro na sogote, ngbani nakpara ni ti aboro, ni ki nioko biriki ku kpotoni yo;

²⁵ho ni agumba wene pai ni, ka mo ídi nga ha ku ngbani ya, bambiko kere gbegberẽpai kpotoni yo saba;

²⁶ka ni vura oka sokote ni birĩ, gani gbegberẽpai adú ni yuguyugu he gbayaga ku bangiri rimbasa.

²⁷Gu boro nage due kina ni nikati ku rogo yo, mbia ki wirigi berewe ku ri gu ni nawiriga ha.

²⁸Gu mirãse nagumba zire si nasoga agu yo si agumba zire kuti yo, ngba zomia boro kina ha napayasi pai.