Read zande Asanza 27 Bible Online

Asanza 27 - zande bible

Asanza 27

¹Ka mo ábia nga tiro tipa gba ya, bambiko mo aina nga gu nikadu gba te.

²Kina kura boro tambua ro, ono mo ni ngbaro te; kungba boro, ono ngbaro te.

³Roĩ mbia aroã, ngume roĩ aróã a, ono ga mumungo boro zinga si roĩ ki susi he wa du he ue.

⁴Er nga kere he, zinga nafu wa ime ki susi; ono da rengbe ka ru barangba iraderingo?

⁵Ruga boro gbayaga ngba ki susi ti gu nyemuse du ni okooko ho.

⁶Ima be badiangba ngba; ono nyora ngba vura boro du ni dungu he.

⁷Gu boro mbi nasoga anyege, ono fu boro gomoro hihii ahe dunduko nziri anzira ngbani.

⁸Wa gu zire ingi bara bamburu, wo du gu boro ingi bara kpuni.

⁹Nzeme mbeda na furu nzeme nafu ngbarago fu kpoto yo, wo du gu wene rugute naye be badia boro.

¹⁰Ka mo mbú nga pa badiaro na badia bamo ya; ka mo ndú nga ku wirinamo yo rago uru ga gberãngbi ya. Mbembedi kuaro ngba ki susi gu wirinamo du tuturu.

¹¹Ako wire, mo dú ni iratatamana, ka fu ngbarago fu kpotore yo, ya mi karaga pai fu gu ni nasoa pai kuti re.

¹²Ngangarã boro nabi kere pai ki gbu; ono zangainahe nandu andu kindi, ki bi mbusa tipa ha.

¹³Mo dí ga gu boro roko du ku ba kungba boro, ki kati ido na ni ho du ni ni nazungadi he ku ba kungba boro.

¹⁴Gu boro nafu maku fu badiani na bakere wawa, niguari ngba wiso, i agéda ha fu ni wa kina pa motiwa.

¹⁵Gu mai namiko amiko kindi ti uru na mai, du wa kina de sakapai;

¹⁶ka za ri du wa kina za yuge, watadu ka zia nzeme ni kumbabe.

¹⁷Kina marã nabeda marã; boro nabeda kurani a.

¹⁸Gu boro nabanda vurumo ari zuzuhe a, gu ni nabanda bairani adú na irisa.

¹⁹Wa boro nabi kpakpuni nzunzu ime yo, wo berã boro nayugo gani apai.

²⁰Baatoro kpikpi aboro na Bagbarasahe ambi nga te, ka bangiri boro ahi nga a ya.

²¹Pere du tipa girisa feda, gbigiwi tipa dahabu, tambua boro tini nasara ngbanga ni.

²²Ka mo súka mumungo boro ku sangu yo na wiri sangu wá sa na sukasuka ahe, gani mungo ago nga ti ni wa sa te.

²³Mo ím pa rimbasa gamo akandoro wenengaĩ, ki ningere wenengaĩ tipa gamo rimbasa anya;

²⁴bambiko nye nga aukumuko anye kindi te; ka kpakpari bakindo nye fu rika ngbatunga aboro kindi?

²⁵Ho nvuo niugu ni, vovo ho nikuru ki sono, i ki nidungura kpepasio ri agangara yo,

²⁶mange wiri kandoro nikafu roko foro, ameme ki du ni geno tipa ngbe ati;

²⁷mamu ameme adú ho nikarengba tipa ga riahe, na tipa gu riahe nga ga gamo aborokporo, ki rengbe tipa gamo amoyambu nga ade a.