Read zande Asanza 28 Bible Online

Asanza 28 - zande bible

Asanza 28

¹Gbegberẽ boro naora ho boro ado nga fuo ni ni ya, ono ruru boro du ni eerẽ ni wa bahu.

²Ho ringara nisa mungu ni dungu abazogo nidu rogo ho; ono be agu aboro du na rugatinapai na inahe si gaha nyaka ka ima ti ni.

³Gu boro zingohe narungosi rungorungo aboro ni wa kina gu mai nafu ka si ambu nga riahe ya.

⁴Agu aboro mbu ndika i natambua gbegberẽ aboro, ono agu yo naka kuti ndika i nadarã kangu na yo.

⁵Gbigbita aboro aruga nga tiyo na ruru sarangbanga te, ono agu yo nagbata Yekova rugu tiyo na ni dunduko.

⁶Gu rungorungo boro nata rogo gani rurupai ngba ki susi ti gu irakumuko nga irakeretu rogo gani apai.

⁷Gu boro naka kuti ndika nga tatamana wiri boro, ono gu ni nga badiata na airaangbu nafu zee fu bani.

⁸Gu boro nakiisa gani kumuko ni mokiisa na gu ku ri he, ni nadungura ha tipa gu ni du na nunga rungorungo boro.

⁹Ka boro di tuni ku sa yo ti gia sangba ndika, zavura gani kpe si ni kina kere gbegberẽpai.

¹⁰Gu boro naingisa ruru boro ku rogo gbigbitapai, ni ati kina ku rogo boro gani due; ono boro zanga pai ku ri ni adia wene ukumbo.

¹¹Irakumuko nga iratatamana bangirini, ono rungorungo boro du na rugatinapai nagbata kina ni.

¹²Ho ruru boro nidi ni be pai, bakere taarimo nidu ho; ono ho gbegberẽ boro niguari ni ku ari, aboro nigbuku agbuka.

¹³Gu boro naoka gani tiandika ni aú nga te, ono gu ni nakusa ha ki nimbu he, ni abí inapai.

¹⁴Boro maku nga gu boro nagunde ti Yekova na uru; ono gu ni nanyakasa ngbaduni yo ati ku rogo gberãngbi.

¹⁵Kere bazogorago ku ri rungorungo aboro du wa gbiriwogbiriwo bahu, watadu wa gu zíngizingi urisi.

¹⁶Gu bazogo zanga rugatinapai nga kere barungosi aboro; ono gu ni nasoga marã mokiisa du ni biriki agízasi gani arame.

¹⁷Ka boro du na ngbanga uka kure boro, ni dú ni merẽmerẽ boro dati kpioni; ka boro únda nga ni ya.

¹⁸Gu boro nata rogo rurupai i abátasa ni abatasa, ono gu ni nga irakeretu rogo gani apai, ni ati ku rogo due yo.

¹⁹Gu boro nasopa gani bino adú na bakere riahe be ni, ono gu ni napeka fuo kungba apai ni adú na rungo kpaima.

²⁰Gu boro du yososo ni akpátari be maku, ono gu ni naipisa tini ka du ni irakumuko azánga nga mbusa te.

²¹Ngba nga pai na pa kparatise te; watadu sa mungu tipa kina wiri mbusuru riahe a te.

²²Iraringi naipisa tini fuo aukumuko, ka ni aina nga ha nga zingohe ayé ku ri ni ya.

²³Gu boro naza kura ni ni abí wenepai giza ki susi ti gu ni nazomia he ni kina mirãni gbua.

²⁴Gu boro nadĩ ga bani ahe watadu ga nani, niya, “Samungu nga ha te,” ni nga badiata na gu boro nagbarasa ahe.

²⁵Irakangadu nazingisa kpata, ono gu ni nakida kuti Yekova, ko akúmukosi ni.

²⁶Gu boro nakida kina kuti gani berã nga mumungo boro; ono gu ni nata ni tatamana i abátasa ni abatasa.

²⁷Gu boro nafu he fu rungorungo boro, zingo ahe amánga nga ni te, ono gu ni naoka bangirini abi dungu motiwa.

²⁸Ho gbegberẽ aboro niguari ni ku ari, aboro nigbuku agbuka, ono ho i nikpiki ni, ruru aboro ninge ange ki susi.