Read zande Asanza 29 Bible Online

Asanza 29 - zande bible

Asanza 29

¹Gu boro ka i vura za ni dedede vurũ, ono ni ki nyakasi rini kindi, gani kpio adá rure, zanga husa ni.

²Ho ruru aboro nidu ni ni aasia pa apai, aboro nangi angi; ono ho gbegberẽ boro nazoga aboro ni, aboro nauko auko.

³Gu boro nakpi nyemu tatamana nangiisa bani, ono gu ni du na ngbanya na adebari nagbarasa kina pa gani ahe.

⁴Bakindo nanyakasa ringara ni ruru sarangbanga, ono gu ni naroga agamahe naba ringara aba.

⁵Gu boro nazomia kurani nagbaraga pio agbaraga ba nduge ni.

⁶Rogo ga gbigbita boro samungu kina gbina du yo, ono ruru boro nabi bia ki ningi.

⁷Ruru boro ini pa gu pai ru fu rungorungo boro, ono gbegberẽ boro aruga nga tini na ngbatunga gu inahe te re.

⁸Bapayasi aboro naba we ti bakporo, ono aboro tatamana nazeresa zinga.

⁹Ka boro tatamana ati kangu na mumungo boro, mumungo boro nazinga ki nimomu, ka zereda adú nga a ya.

¹⁰Aboro nyemu uka kure nasoga gu ni asoga zanga pai ku ri ni, ono tipa ruru boro, i nagbata kina ungani.

¹¹Mumungo boro nakusa gani zinga akusa dunduko, ono boro tatamana naka na gani zinga ki zeresi he.

¹²Ka bazogo dege tuni sa pa zire, gani abanyaki dunduko adú ni kina gbegberẽ aboro.

¹³Rungorungo boro na barungosi aboro i gbia tiyo wa sa; Yekova naasa bangiriyo wa du yo ue.

¹⁴Ka bakindo sari ngbanga fu rungorungo aboro rogo gu pai rengbe arengba, gako mbatabakindo adú ni nyakasinyakasi he nye anye kindi.

¹⁵Kpudu gbia kuti zapai nafu tatamana, ono gu gude mbu yo ni ni tini nafu kina zee fu nani.

¹⁶Ho gbegberẽ aboro nidu ni ni aasia pa pai, samungu nimoi pai amaa; ono ruru aboro angéra ki bi tigo yo.

¹⁷Mo rúgu wiro, ni ki fu zereda foro; ni afú ngbarago ku kpotoro yo a.

¹⁸Ho adu nga gumbapai wa nebi ni ya, dingisaro adu nga ti aboro a te, ono boro maku nga gu ni ka kuti sangba ndika.

¹⁹Ka i rúgu nga moyambu na kina gumba apai gbua ya, bambiko ka ni vura ruga tini na ni, ni amánga nga ha te.

²⁰Mo bi gu boro nagba sa gumba pai? Maabangirise du ho tipa iramungo ki susi ni.

²¹Gu boro nambu ti gani moyambu du wa gbe ango due yo.

²²Boro zinga nazingisa kpata, gu boro fu tini sa zinga nakusa pa dungu samungu.

²³Kina ga boro ruka nikaumbasi pa ni, ono gu ni du na toro umbasitise nikadia irisa.

²⁴Gu boro nga badia iradĩ nasoga kina ungani; bambiko ni nagia pa motiwa ka ni akusa nga pai ya.

²⁵Gunde ti boro nare gbina, ono gu ni nakida kuti Yekova ni du zezeredi.

²⁶Dungu aboro nagbata pa ngbanya nga ga bazogo, ono ga boro ruru sarangbanga naye yo du Yekova ni.

²⁷Iraira boro nga gbegberẽ boro bangiri ruru boro, ono gu ni du gani apai ni ruru he, ni wa kere gbegberẽ boro bangiri gbegberẽ boro.