Read zande Asanza 3 Bible Online

Asanza 3 - zande bible

Asanza 3

¹Ako wire, ka bangiro nigó nga ti gi yugopai ya, ono ngbaduro niká kuti sangbare;

²bambiko si afú zereda foro kpaima, na gbanga arame na agarã ungaro.

³Ka mo nimbú nga pa weneringise na rengo ya; mo vódi he ku goro kirikiri, mo ké he ku ngbaduro yo.

⁴Si du mo ka ngba ti ni bangiri Mbori na aboro a, ki du na wene rugatinapai.

⁵Mo kída kuti Yekova na kpotoro yo dunduko, ka mo nikída nga kuti gamo rugatinapai ya.

⁶Mo rá fu ko rogo gamo apai dunduko, Mo arúga gamo apai foro nzunzu.

⁷Ka mo tigamo nibérẽ nga ha ya mo du ni iratatamana ya; ono mo gúnde ti Yekova, ki guari pati gbigbitapai.

⁸Si adú ni ũhusa ro fu ungaro, ni nzeme ngua fu amemero a.

⁹Mo írisi Yekova na gamo ahe du, na amakawa gamo bambata zuzu ahe naida;

¹⁰si du gamo agbamu ka hika ti ni be dungu ahe, gamo ba aũ piraahe ki du wa ka si sumbu asumba be vovo imekakue.

¹¹Ako wire, ka mo gíndiga nga pa gu rugapai nga ga Yekova ya, watadu ka mo ambú nga be gako zapai a ya,

¹²bambiko Yekova naruga gu ni ko nakpi nyemu ni, wa kina bagude na gu wirini ngba ti ni.

¹³Boro ngbarago nga gu ni ini tatamana, na gu boro du na rugatinapai,

¹⁴bambiko mokiisa ha ngba ki susi mokiisa baga feda, gu mokiisa du ti ni si ki susi ga dahabu.

¹⁵Si ngba ki susi ti ngungungu ambia fongahe, he ho mo akpi nyemu he, ka rengbe na ni te.

¹⁶Gbanga arame du rogo kumbabehe; rogo garebehe du aũkumuko ni na irisa.

¹⁷Gaha apai nga agene wene apai, na gaha agene dunduko nga agene pa zereda.

¹⁸Si nga ngua unga fu agu yo zadi he; ngbarago du fu agu yo dunduko ka kuti ni nyanyaki.

¹⁹Yekova amoi mburu zegino be tatamana; be rugatinapai ko ambakadi angbangbaturũ ti ni;

²⁰be gako inahe angirimo adewe gaha agene ti ni, adubo ki nifu ndomo.

²¹Ako wire, mo ká kuti ndikidi tatamana na sia pa pai; ka si nigó nga bangiro ya;

²²si du si akadu ti ni ni unga fu mbisimoro, ni aũfongo ku goro.

²³Si du mo atá rogo gamo apai ni bandabanda ro, ka nduro akóta nga ya.

²⁴Ka mo sungu sande, mo adú nga na gunde te; ho mo akapi ni sande, ga rame anidu ni wene he.

²⁵Ka mo nigúnde nga be tunguotunguo gbudagbuda ya, watadu be gbarasa he nga ga gbegberẽ aboro, ni gu rago si niye a ya;

²⁶bambiko Yekova adú ni ga zukazukapai, ko abánda nduro be zia ha.

²⁷Ka mo niká nga na manga wenepai fu agu yo du he fu yo ya, ho rengbe mo arengba ni namanga ha.

²⁸Ka mo niyá nga fu kuaro wẽ, “Mo ndú, ki ye berewe, gba mi afú he foro” ― ho du he ni kina be ro, ya.

²⁹Ka mo nisángi nga gbigbitapai kuti kuaro ya, wa du he nga ko naraka ni bandabanda ko pati ro.

³⁰Ka mo nitá nga kpata na boro zanga nduhe ya, ho ni aimisa nga ro ni ya.

³¹Ka mo nikpí nga boro zuu ya, ka mo nisía nga gu sino sa nga gani ya;

³²bambiko irakeretu nga kere gbegberẽ boro bangiri Yekova; ono ruru boro du rogo gako pa du zukazuka.

³³Ga Yekova motiwa du ri ga gbegberẽ boro bambu, ono ko nafu maku ku ri ga agu yo kporo nga ruru yo.

³⁴Ni rengo ko napayasi abapayasi pa apai, ono ko nayugo inapai fu agu yo naumbasi tiyo.

³⁵Iratatamana adía ũkumbo taarimo, ono mumungo aboro adu na kina zee.