Read zande Asanza 30 Bible Online

Asanza 30 - zande bible

Asanza 30

¹Agura wiri Yake nangia boro Masa, sangbako du re. Gu boro naya fu Itiere, fu Itiere na Ukara wẽ:

²Ni rengo mi wa kina gbogoro adu nga wa boro ya, du nga mi na gu rugatinapai nga ga boro te.

³Mi awirika nga pa tatamana te, mi aina nga pa gu Ziazia Ko a te.

⁴Da naga ku ngbangbaturũ yo ki zorõ kono? Da nadungura nga yuge ku duguru beni yo? Da navo nga ime ku rogo roko yo? Da nanyakasi adigida kpotosende dunduko? Rimoni nga da, rimo wirini a nga da? Mo ini he, ni rengo!

⁵Ga Mbori apai dunduko du ni ndikidi rengo; ko nga vurakube fu agu yo nakida kuti ko.

⁶Ka mo agbía nga kura pai kuti gako apai ya, ko ka za ro, mo ki du ni irazire.

⁷Mi nasana ro tipa apai ue; ka mo ká nga na ni be re mbata mi nikakpi ya;

⁸Mo gbísi pa ruka ti re tuturu na gumbazire; ka mo fú nga rungo fere watadu aukumuko a ya; ono mo rígi re ni kina gu riahe rengbe fere;

⁹mi ka mbi, ki oro rimoro, ki ya, “Da nga Yekova?” watadu mi ka du ni rungorungo boro, ki dĩ he, ka gbarasa rimo gi Mbori.

¹⁰Ka mo rungba nga pai ti rimo moyambu fu bairani ya, ni ka tiwa ro, mo ki du na ngbanga ku ri ro.

¹¹Aboro kina ho nagberã ngbayo yo fu abayo, ka i afu nga irisa fu anayo ya.

¹²Aboro kina ho du ziazia bangiriyo, ono i gigiri ti gayo biriko te.

¹³Aboro kina ho Ako! na kii payo bangiriyo, wawa! i nazara ngakaĩyo!

¹⁴Aboro kina ho du rindiyo wa kina abasape, na gburukayo wa asape, ka rita rungorungo aboro auru kpotosende, na airazingohe dagba aboro.

¹⁵Wiri amatundu ni anara ue nakpara niya, “Mo fú he. Mo fú he.” Ahe ho biata ambi nga ya, ii, si ho biama a naya nga, “Si rengbe” a ya:

¹⁶Nga Baatoro kpikpi aboro, na rukumbu zangada, kpotosende nahi nga be ime ya, na we aya nga “Si rengbe,” a ya.

¹⁷Gu bangiri boro nawia bani ki nipayasi pa gia sangba nani, agu anguku du ngboongboorago yo amófa bangirini amofa, paranga adingimo ki riti he.

¹⁸Ahe ho biata iriwo ti re ki susi; ii, si ho biama mi aruga nga tire na pa ha ya:

¹⁹nga, pa gu gu nga ga dingimo ari yo, pa ga wo nduge ri mbia yo, pa nduge bakurungba ri baime, na pa ga kumba pai na ngasu de.

²⁰Gere nga gu pai nga ga debari: ri nari he, ki wege ngbari, ki ya, “Mi amanga nga gbegberẽpai te.”

²¹Be ahe biata zegino nakio be he; ono be ahe biama si arengba nga na ru ku ba ha te:

²²ho kanga nisa tini ni ni bakindo, ho mbi gu boro zanga wene berã ni be riahe;

²³ho gbegberẽ sino de nidi kumba ni, na ho kangade nidi ba nairari ni.

²⁴Anya na agbiro ho biama du ni rukutu ra auru kpotosende, ono ami nga airatatamana ki susi:

²⁵Angbari nga agu agbiro adu nga nyanyaki ya, ono ami nadungura gaami riahe kita;

²⁶anya du wa ndakuta adu nga na ome ya, ono bambura kina sii ambia yo;

²⁷ayere adu nga na bakindo ya, ono ami dunduko nandu na rikara;

²⁸na garamura mo rengbe ka zia ru na bero ono u kina rogo ga abakindo abambu yo.

²⁹Ahe ho biata nandu ni wene nduge; ii, si ho biama nandu nduge wenengaĩ:

³⁰bahu nga gu ru susi dagba anya dunduko, u ane nga gene fu gu nya te;

³¹farasi vura; bameme a, na bakindo nandu mbata yo fu gako aboro.

³²Ka mo mangi pai ni mungo ni kiisa pa tiro, watadu mo aberẽ pa sanga gbegberẽpai, mo moi bero ti ngbaro.

³³Bambiko kina kama mamunya nakusa nzemehe, ka kafio õse nakusa kure, na zinga ni ome nakusa kpata.