Read zande Asanza 31 Bible Online

Asanza 31 - zande bible

Asanza 31

¹Sangba Remuere, bakindo Masa, nga agu apai nako ayugu he fu ko:

²Ako wire, gini pai? Ako wire nakuru rukumbure yo, gini pai? Ako wiri gi kidohe, gini pai?

³Ka mo nyási nga omero fu ade ya, gamo apai fu agu yo nagbarasa abakindo a ya.

⁴Ako Remuere, si tipa abakindo te, si tipa abakindo ka mbira imekakue te, watadu fu abazogo ka kpi nyemu baripiro a te;

⁵i ka mbira ha, bangiriyo ki go ti gu ndika i aru he, i ki irasi sarangbanga nga ga ga rungosirungosi yo dunduko.

⁶Mo fú baripiro fu kina gu ni he amaka ni, na imekakue fu gu boro du na kere rungo kpotoni yo;

⁷i mbiri he, bangiriyo ki go ti pa gayo rungo, ka i atingida nga pa gayo kere rungo berewe ya.

⁸Mo gúmba pai ku ba boro bubo, na gu pai ru aru tipa agu yo dunduko i ambu yo ambu.

⁹Mo gúmba pai ki sari ngbanga ni ruru he, ki mbakadi pa sarangbanga fu rungorungo boro na irazingohe.

¹⁰Da rengbe ka bi wene sino de? Ri ngba ki susi ngungungu ambia fongahe.

¹¹Kumbari ki nikida kuti ri kpotoko yo, ka zingo u amánga nga ko ya.

¹²Ri namanga pa ko wenengaĩ na auru dú, wa du ri ni ungari, zanga manga ko na gbigbitapai.

¹³Ri nagbata mange kandoro na giri nzibi, ki nimangi sunge na beri ni nyemuhe.

¹⁴Ri wa kina gu bakurungba nga ga ababagiahe, ri naye na gari riahe tuturu.

¹⁵Ri nazinga rame yo kina boro yuru ka fu riahe fu gari aborokporo, na sunge fu gari amoyambu nga ade.

¹⁶Ri niberẽ pa gu ati ki ngbe he; be u ri be beri ri narúka abakakue ati yo.

¹⁷Ri natapa dimori na ome, ki nyakasi aberi.

¹⁸Ri ini he ya gari bagaahe nakusa bakere mokiisa. Gari we atara abisa nga yuru te.

¹⁹Ri moi beri ti ngua ba giri remu, ki zadi wiri ngua uda giri remu ni beri.

²⁰Ri nafu ahe fu rungorungo boro, ki taĩ beri fu boro zingohe.

²¹Ri agunde nga be zere morogumba tipa gari aborokporo te, bambiko gari aborokporo du ni ukadiukadi yo dunduko na gu roko du gia.

²²Ri natuka roko tipa fonga vuru bambu yo ni kina beri; gari roko ni tutu giri nzibi ni ngungungu he.

²³I niini kumbari ngbadimo bakporo yo, ho ko nisungu ni dagba abaakumba ringara.

²⁴Ri natuka wene aroko ni giri nzibi ki nibagi he; ri nakusa agiri dimose fu ababagiahe.

²⁵Ome na irisa du wa gari roko, ri namoma, pai bangiriri tipa gu rago nikaye te.

²⁶Ri naza ngbari na fugo tatamana, gu yugopai nga ga weneringise nakura ngbari yo.

²⁷Ri nangera wenengaĩ tipa agu apai nga ga gari aborokporo, ka ri ari nga gu riahe nga ga nyomoro ya.

²⁸Awiriri niguari ku ari niyambu ri de maku; kumbari a, ko nasambua ri, niya:

²⁹“Dungu ade mangi pai ni bawene he, ono mo mangi he ki susi yo dunduko.”

³⁰Gu pai ngba du na nangahe ti ni, na ngbanya du gbua, ono gu de nagunde ti Yekova, ri adú ni sambuasambua ri.

³¹Mo nifú gu zuzu he fu ri naye be ri, kina gari mangaapai sámbua ri ngbadimo bakporo yo.