Read zande Asanza 4 Bible Online

Asanza 4 - zande bible

Asanza 4

¹Ako awire, oni gí ga baroni rugapai, oni dége turoni ka ina pa rugatinapai;

²bambiko mi nafu wene andika fu roni: ka oni nimbú nga gi rugapai ya.

³Ho mi adu ni ni gude na buba, ka mi ata nyakada nga ya, ni bangisa re bangiri nina,

⁴ko ayugu pai fere, ki ya fere, “Mo nidíka gi gimi apai re ku ngbaduro yo; ki ka kuti sangbare, mo ki nye ni ungaro;

⁵ka bangiro nigó nga ti ni ya, ka mo bása nga agu apai du ngbare ya. Mo nigbáta tatamana, mo nigbáta rugatinapai.

⁶Ka mo nimbú nga ha ya, si abanda ro; mo kpí nyemu he, si abátasa ro;

⁷Tonatona mburu tatamana nga gere: Mo nigbáta tatamana, ii, na ku ri agu apai dunduko bi mo, mo nigbáta rugatinapai a.

⁸Mo sámbua ha gbe, si akíisa paro; si afú irisa foro ho mo ka dia ha ni ku gume.

⁹Si afú kpakpari undahe ku riro yo; si akúsa kpakpari taarimo foro a.”

¹⁰Ako wire, mo gí gimi apai ki di he ku gume, garã ungaro ki du ni dungu he.

¹¹Mi yugu pa gene tatamana foro; mi ngbe ku mbata yo foro ngba agene rurupai.

¹²Ho mo ka ta ni, he ho nikaza ro te; ka mo aóra, mo akóta nga a te.

¹³Mo ká kuti rugute nyanyaki, ka mo nimbú nga ha si merẽ ya; mo nibánda pa ha bambiko si nga ungaro.

¹⁴Ka mo nirími nga ngba gene gbegberẽ aboro ya, ka mo nitá nga ngba gene amangi gbegberẽpai a ya.

¹⁵Mo né he; ka mo nindú nga ngba ha ya; mo ária tiro ngba ha ki susi ku mbata yo.

¹⁶Bambiko i arengba nga ka ra te, kina gu ka i mangi gbegberẽpai; i nidi rame ku sa yo bangiriyo yo, kina gu ka i mangi kura aboro i koto.

¹⁷Bambiko i nari gu riahe nga ga gbegberẽpai, ki nimbiri gu imekakue nga ga zuu.

¹⁸Ono ga ruru aboro gene du wa gu imarago nga ga ngbawiso, nakĩ akĩ ki susi ki da ti kina bebere uru.

¹⁹Ono ga gbegberẽ aboro pai dũ wa kina nduunduu bitimo; i aina nga gu he i akotoka ti ni te.

²⁰Ako wire, mo dége turo sa gimi apai; mo yé turo sa gi gumba apai.

²¹Ka mo nimbú nga ha si go bangiro wa sa ya; mo niígi he kina ku ngbaduro yo.

²²Bambiko si nga unga fu gu ni bi he, ni ũhusa fu kpotoni dunduko.

²³Mo nibánda kpotoro yo ngangarã; bambiko yo unga naye ni.

²⁴Mo nimbú gumba iraira fugo, mo bá fugo keretu tuturũ ti ro.

²⁵Bangiro ningére ku mbata yo diiri, mo ki ningere ku mbata yo bara bangiro.

²⁶Mo nimbákadi ba nduro kpasakpasa, si du gamo apai ka du ti ni dunduko ni mbakadimbakadi he.

²⁷Ka mo nisá nga tiro ku kumbabe na ku garebe yo a ya; mo ária nduro ti gbegberẽpai.