Read zande Asanza 5 Bible Online

Asanza 5 - zande bible

Asanza 5

¹Ako wire, mo nidége turo sa gi tatamana, mo niyé turo sa gi rugatinapai;

²si du mo ka du na sia pa apai ti ni, ngbaro ki nika kuti inahe.

³Bambiko fugo ku ngba kungba de nayuro wa nzeme anyege, fugori ki zerenge ki susi nzeme;

⁴ono ti digida gari pai si du ni nirãnirã ha wa hihii ngua, ki du ni tĩtĩ he wa baso du na rindihe ue.

⁵Nduri nandu ngba gene sa kpio; nduri napeka gene ku Baatoro kpikpi aboro yo;

⁶ri aberã nga pa gene unga te; gari apai nata ata, ka ri aina nga ha ya.

⁷Ako awire, ono awere oni nidége turoni kono du mi ni, ka oni nigúari nga pati sangbare ya.

⁸Oni gbísi gaoni apai tuturũ ti ri ku sa yo, ka oni nimbédi nga ku pa ngbadimo gari bambu ya;

⁹oni ka fu gaoni irisa fu kura aboro, na garãroni fu azangainapai;

¹⁰auro ka dia gaoni ũkumuko, gaoni ũsunge ki du dimo ku auro yo;

¹¹ti digida ungaroni oni aúko auko, ho pasioroni na bororoni ka nyasa ni,

¹²oni ayá, “Waĩ mi asogo rugapai, ngbadure yo ki nipayasi pa zapai!

¹³Mi aye nga ture fu gimi abayugupai ki dege ture fu abarugure a te.

¹⁴Mi adu mbembedi tipa gbarasa re dunduko, rogo gbuu dungurati.”

¹⁵Mo mbíri ime kina rogo ga due ime, na gu ime nafu rogo ga guga.

¹⁶Si rengbe gamo agugaabi gbandaka agbandaka tuturũ, ime ki fu wa wiriadi ku agene bakporo yo?

¹⁷Si dú tipa kina ro ni sa ro, tipa kungba aboro na mo te.

¹⁸Ga gugaabi dú na maku, mo ningí tipa de parangaro,

¹⁹ri wa gu ngbiimo du ni wene ru ni bawene nara. Gari nyemuse ki rengbe foro wa rago agira; mo nikpí akpi be gari nyemuse na uru.

²⁰Ako wire, tipagine ka mo akpi nyemu kungba de ti ni, ki nidungo kungba boro kuti ngbaduro?

²¹Bambiko ga boro apai dũ si kina ku bangiri Yekova, ko nakparia pa gani apai dunduko.

²²Ga gbegberẽ boro irairapai zi kina ni, ni ni zizi ni be giri gani ingapai.

²³Ni kpi be zingo ruga ni, ni ndu be gani bakere mungo ngbuongbuo.