Read zande Asanza 6 Bible Online

Asanza 6 - zande bible

Asanza 6

¹Ako wire, ka si du wa mo du tipa tumo kuaro, ki kido he tipa kungba boro;

²ka ngia mo ni zizi ro be gu pai kuru ngbaro yo, ni vovo ro be gu pai gumba mo ho;

³Ako wire, mo mángi gere, ka batasa tiro, wa du mo kina ku ba kuaro; mo ndú, ki umbasi tiro, ka zungadi tiro fu kuaro.

⁴Ka mo rá nga ya, ka rame zí nga puku bangiro a ya;

⁵Mo bátasi tiro wa gbangbaria be bamangi ru, na wa zire be baimi ru.

⁶Ako iranyomoro, mo ndú koyo du angbari ni; mo bérẽ pa, gaami mangaapai ka du ni iratatamana.

⁷Nga agu ra adu nga gbia ku ri ra ya, babiapai watadu barugupai a te.

⁸Ami nambakada gaami riahe kita, ki nidungura gaami riahe ti regbo ke ahe.

⁹Ako iranyomoro, mo apí yo tipa rago waĩ? Ni gini rago mo ka zinga be ga rame?

¹⁰Wiri rame mbata toni, wiri yukura a toni, ki uya bero ngbutuko ka ongoda,

¹¹si du ga rungo ka ye ti ni wa ga yaura rago zingohe wa boro vura.

¹²Gu boro are nga na pai ya, nga boro irairapai, ni nata na kina pa biriki ngbani,

¹³ni napira bangirini, ki nibakaya rago ni nduni, ki niyugu pai ni wirinzagani,

¹⁴ni nasanga gbigbitaapai na gu biriki du kpotoni yo kindi, ki nienge tikangu dagba aboro;

¹⁵si du gberãngbi ayé ku ri ni ni tunguotunguo ho rure; tipa ngbutuko rago pai akúadi ni gasi husa ni.

¹⁶Apai ho sita Yekova nasoga ha, ii, apai saba nga kere gbegberẽ he ku bangiriko:

¹⁷nga ngera ruka, na gu mirãse nare zire, gu be nauka kure boro wenesa,

¹⁸na gu ngbaduse nasanga gbigbitapai, gu ndue naipisa tihe ka ora sa gbigbitapai,

¹⁹irazire dezire nagumba kina azire, na gu ni naenga pa tikangu dagba awirinani.

²⁰Ako wire, mo ká kuti sangba bamo, ka mo mbú nga gu yugopai nga ga namo ya.

²¹Mo nidi he ku ngbaduro yo kindi, mo ki nivo ho kuti goro.

²²Ho mo ka ta ni, si nikangbe foro ku mbata yo; ho mo ka ra ni, si nikabanda ro, ho mo ka zinga ni rame yo, si nikafura na mo.

²³Bambiko sangbayo wa ima baro, yugopai ki du wa imarago, gu zapai nga ga rugapai si nga gene unga,

²⁴ka banda ro be gbegberẽ de, na be gu zomiapai nga ga mirã kungba de.

²⁵Ka mo nikpí nga nyemu ri kuti ngbanyari kpotoro yo ya, watadu ida fu ri ri gbe ro ni sanza bangiriri a ya;

²⁶bambiko i ngbe natakuari na kina mbusuru riahe, ono debari nagbata kina unga boro.

²⁷Boro rengbe ka dia we kuti ngbaduni ka gani roko agbi nga ya?

²⁸Watadu boro rengbe ka ta ri kingiri we, ka nduni arubaga nga a ya?

²⁹Wo du gu ni narima fuo dia kurani, gu ni ka zadi ri ni agá nga zanga mbusa te.

³⁰Aboro napayasi nga iradĩ ka ni dĩ he ka za gani gomoro ho si amanga ni ni, te?

³¹Ono ka i zi ni, ni akáraga genoho wa bara saba; ono ni anifu gani ahe afu dunduko du dimo kpuni yo.

³²Gu boro namanga bari wene berã ti ni te; gu ni namanga gu pai re nagbarasa kina tini.

³³Aoro na zee nikazia ni, ka gani pa zee ago nga ya.

³⁴Bambiko deringo nazingisa boro, ka ni ambú nga ha ti uru irabape ya.

³⁵Ni áida nga pa wiri motumo tipa ha wa sa te, ka mo vura ngeesa gamahe ni azéra nga a te.