Read zande Asanza 7 Bible Online

Asanza 7 - zande bible

Asanza 7

¹Ako wire, mo ká kuti gimi apai, ki niigi sangbare ku kpotoro yo;

²mo ká kuti gimi arugute ka nye ni ungaro, ki ka kuti gimi yugopai wa zende bangiro;

³mo vódi he kuti awirinzagaro, mo ké he kpotoro yo ku ngbaduro yo.

⁴Mo yá fu tatamana wẽ, “Mo nga dawire,” ki ya ti rugatinapai de ngbanya du;

⁵si banda ro be kungba de, na be wiri kungba boro navuro ro na gari wene apai.

⁶Mi angere ku zegi yo dagba watawata ngua, ti bangiri gi bambu,

⁷mi ki bi boro dagba azangainahe, mi ki ini boro dagba paranga aboro yo, nga paranga kumba naadu nga na rugatinapai ti ko ya,

⁸naasusa ti gene mbembedi pati tukpu gari bambu, ko ki ndu gene ku kpuri yo,

⁹ngba nzinzii rago, ho uru ati ni, yuru ti rago bitimo.

¹⁰Mo ngére, de ki gbia ko, naukadi tiri na roko debari, vuroro ki du ku kpotori yo.

¹¹Ri nataka wawa ki nimangi kina gu pai ri akpi nyemu he, ka ri asunga nga ku kpuri yo ya;

¹²awere ri ngba gene bakporo, awere ri babagaahé yo, ki nisungudi boro ti durugaduruga rago yo dunduko.

¹³Ri zi ko ki dungo ko, ki nyoro ngbako, ki ya fu ko zanga zee kpakpuri yo:

¹⁴“Mi afu amotumo zereda, areme mi nifu gi marã zungahe;

¹⁵si du mi niye ti ni ka gbia ro, ka gbata ro nyanyaki, mi bi ro.

¹⁶Mi mbakadi gi ba na kendegekendege aroko, nga gbafiogbafto aroko nga ga giri nzibi Ezipeta.

¹⁷Mi migidi gi barame na wene fuõ mure, na ngua aaroi na zuzu kinanona.

¹⁸Mo yé, ani nyási gaani nyemuse ki da ku wiso; ani fú wasa fu bororani ni nyemuse.

¹⁹Bambiko kumbami tii kporo te; ko ndu gbanga nunguro;

²⁰ko nindu na marã rogo mangu; ko ayéga diwi ki du ni kpakpu bandimo.”

²¹Ri ki nisosodi ko na gari vuroro du ngbari; ri ki nangi ko na gari wene fugo, ko ki idi pa ri.

²²Ko ki nindu fuo ri ni ba sa, wa babagara nandu tipa imo ru, watadu wa gu bangbiimo zi yo ru nyanyaki,

²³daho guanza ka kora vuru ni dati aúvuru yo; wa zire naipisa tiru sa gbina, ka u aina nga ha nga ũ kpioru nga ha ya.

²⁴Ako awire, oni dége turoni awere kono du mi ni, ki ye turoni sa agu apai du ngbare.

²⁵Ka oni niídi nga kpotoroni yo tipa gari apai ya, ka oni ndú nga ngbuongbuo ngba gari agene ya;

²⁶bambiko ri bafu badungu aboro ku sande na aoro; ii, agu yo imi ri yo dunduko nga dungu rimbasa airaome.

²⁷Gari bambu nga gene ku Baatoro kpikpi aboro yo, nandu ku sende yo sa agu abambu nga ga kpio.