Read zande Asanza 8 Bible Online

Asanza 8 - zande bible

Asanza 8

¹Tatamana ayamba nga he, te? rugatinapai apaa nga ku ari, te?

²Si narunda ngboso agene yo, ri tumbatumba arago yo pangba gene;

³pati angbadimo ku barangba bakporo yo, ti abarima ku bakporo yo si napaa ku ari ki niya:

⁴“Ako aboro, mi nayamba roni, gi kpe du fu awiri aboro.

⁵Ako oni nga azangainahe, oni rúgu tironi na pa birĩ; Ako airamungo, oni dú na rugatinapai.

⁶Oni gí he, bambiko mi agúmba pa bakumba apai fu roni, ono agu apai mi ka za ngbare na ni, si adú ni rurupai;

⁷bambiko ngbare agúmba kinaku rengo; gbegberẽpai du ni kere he fu ngbare.

⁸Agu apai dunduko du ngbare nga kinaku rurupai; a nga pai ngbare du ni iraira ha, na gberãringi te.

⁹Si dunduko nzunzu fu gu ni naruga tini na pa ha, ni ruru he fu agu yo ini pa inahe.

¹⁰Oni rogo gi rugapai ku ba feda, na inahe ku ba siasia dahabu;

¹¹bambiko tatamana ngba susi ti ngungungu ambia fongahe, agu ahe dunduko ka oni akpi nyemu he i aringbisa nga ha na tatamana te.

¹²Mi nga tatamana naraka na wene birĩ, mi ki bi inahe na sia pa apai.

¹³Gunde ti Yekova nga soga gbigbitapai. Ruka na kiisapatise, na gbigbita sino na fugo biriki, si mi nasoga.

¹⁴Rugapai du ngbare, na ndikidi tatamana, mi du na inahe, ki du na ngarã a.

¹⁵Bambiko re abakindo azoga rago ti ni, agbia ki nir ũ ruru ndika.

¹⁶Bambiko re abazogo azoga rago ti ni, na abaakumba ki nisapu ngbanga auru kpotosende no.

¹⁷Mi kpi nyemu agu yo nakpi nyemu re, agu yo nagbata re sirisiri i abí re.

¹⁸Aũkumuko na taarimo du be re, ii, nyenye kumuko na u a.

¹⁹Gi zuzuhe ngba ki susi dahabu, zavura wene dahabu vurũ, gu he nazuka fere si susi siasia feda.

²⁰Mi nata ngba kina gene rurupai, ngba agene ruru sarangbanga,

²¹nifu ũkumuko fu agu yo nakpi nyemu re, ki nihihiisi gayo baiga amarã.

²²“Yekova afu re ti tonatona rago gako sunge, mbata fu kuru gako mangaapai.

²³Mi adu kina ho bakuru yo, ti tonatona rago, mbata kpotosende nikatona.

²⁴Ho angirimo adu nga ni ya, mi adu kina ho, ho agugaabi adu nga ni na ime rogo ho a ya.

²⁵Mbata abaagangara nikadu, na mbata fu agangara, mi adu kina ho;

²⁶ho Mbori ata manga nga kpotosende ni, na aati ya, watadu ka nvutu ata du nga zegino a ya.

²⁷Ho ko anyakasi angbangbaturũ ni, mi adu kina yo, ho ko ambakadi he ni ni gidigidi he auru ngirimo,

²⁸ho ko amangi vuro angbangbaturũ ni ni nyanyaki he ku ari ho ko ageteke ngirimo gugaabi ni nyanyaki,

²⁹ho ko akpara bangbanda abaime ni, ya ka ime agu nga auru sangbako ya, ho ko amoi ba amburu kpotosende ni,

³⁰mi adu kina pati ko, wa bangbasia boro sunge; rago angba ti ko mbiko re na auru dunduko, mi ki ningi na auru bara bangiriko,

³¹ki ningi mbiko pa gako kpotosende aboro naraka auru he, rago angba ti re mbiko awiri aboro.

³²“Ako awire, oni dége turoni awere kono du mi ni: rago nangba fu agu yo naka kuti gimi apai.

³³Oni gí rugapai ki du na tatamana, ka oni bása nga ha ya.

³⁴Rago ngba fu gu boro nagia sangbare, ki nisungudi gimi angbadimo bakporo na uru, ki nisungu ti gimi angbadimo.

³⁵Bambiko gu boro bi re ni bi unga, ki nibi wene apai be Yekova;

³⁶ono gu ni abi nga re ya ni nagbarasa kina tini; agu yo dunduko nasoga re nakpi nyemu kina kpio.”