Read zande Batungusipai 1 Bible Online

Batungusipai 1 - zande bible

Batungusipai 1

¹Sangba Batungusipai du re, nangia wiri Dawidi, nangia bakindo ku Yerusarema yo.

²Kungba pai nga ga kungba apai, wo poi Batungusipai, kungba pai nga ga kungba apai! Apai dunduko nga kina kungba apai.

³Gini u du fu boro be gani sunge dunduko nga gu ni amanga ha tii uru no?

⁴Rikaaboro sa nasusa, kura rikaa boro ki niye, ono kpotosende nye anye kindi.

⁵Uru nakura, uru ki niti, ki niipisi tihe ku rogo gu ba ha si nakura ni.

⁶Yuge naya ku sudiyo, ki aria tihe kirikiri ku nodiyo; si naaria tihe kindi kirikiri rogo ba ha, yuge ki nikaraga tihe berewe kina ku rogo gu ba ha.

⁷Adi dunduko nafu ku baime tikpo yo, ono baime tikpo ahi nga be he te; yo adi naafu ku ho ni, kina yo si afu ku ho ni berewe.

⁸Apai dunduko du ni kina pa mbugo; boro arengba nga ka gumba pa ha te; ka bangirise bi nga he si ki rengbe bangirihe te, ka tue gi nga pai si ki hi be he te.

⁹Kina gu he nidu kina ha nikadu, kina gu pai mangi yo kina ha i nikamanga; a nga vovo he tii uru no te.

¹⁰He ho aboro niya ti ni, “Oni bi, vovo he du re”? Si aima du ho, ti agu agarã naadu mbata fu rani.

¹¹I atingida nga pa agu arikaaboro naadu mbata te, kina wo i ka atíngida nga pa agu apai nikamanga dagba agu yo nikaye fuo yo a ya.

¹²Mi nga Batungusipai adu ni bakindo ku ri aYisaraere Yerusarema yo.

¹³Mi ki fu gi berã ka gbata apai du ni mangimangi he tii ngbangbaturũ no dunduko ka wisiga pa ha ni tatamana. Si nga baiimi sunge nga gu Mbori afu fu awiri aboro i nimangi he.

¹⁴Mi bi pa agu asunge dunduko i namanga ha tii uru no; oni ngére, si dunduko nga kina kungba pai na wa pa peka fuo yuge.

¹⁵Gu he du ni nuganuga ha ka i rugu nga ha te, na gu he zingo ho amanga ka i gedi nga ha a te.

¹⁶Mi aya ku kpotore yo, “Mo ngére, mi tigimi du na tatamana bakere, ki susi agu yo dunduko naadu mbata fere ku ri Yerusarema; gi berã adu na tatamana rugatinapai na inahe gbe.”

¹⁷Mi ki fu gi berã ka ina pa tatamana na ka ina pa mungo na pa ngbaangbaa. Mi ki ini gere a ya si adu wa kina pa peka fuo yuge.

¹⁸Bambiko rogo bakere tatamana, yo du bakere rungosi ni a, gu ni nakiisa gani inahe kindi nakiisa kina imisiripai a.