Read zande Batungusipai 10 Bible Online

Batungusipai 10 - zande bible

Batungusipai 10

¹Kpikpi azii nasa ga bamangi furũ nzeme si nifũ gbegberẽ; kina wo bete ngbaangbaa nasusa pa tatamana na irisa.

²Bagunda iratatamana du ku ngbaduni yo ku kumbabe, ono bagunda iramungo du ku ngbaduni yo ku garebe.

³Zavura ho boro ngbaangbaa nata ni ngba gene, ni nazanga rugatinapai, ni naya fu aboro dunduko wẽ, ni nga boro ngbaangbaa.

⁴Ka bazogo zingi kuti ro, ka mo gúari nga ba ro ya, bambiko umbasitise nazeresa bakere irairaapai.

⁵Gbigbitapai ho nga gu bi mi tii uru no, si wa irairapai nakura be kina bazogo:

⁶i namaa airangbaangbaa ri dungu tumbatumba arago, airakumuko ki sungu rogo tiditidi ba.

⁷Mi bi akanga ku ri afarasi, awiri bakindo ki nita ni nduyo wa akanga.

⁸Gu boro nage due kina ni ati ku rogo ho; gu ni ka kua ndugu ku vuru he yo, wo adé ni.

⁹Gu boro nage mbia kina ha nikahoga ni; gu ni nasapa ngua adu ngba pai yo be he.

¹⁰Ka marã du ni kpurakpura ha, ka boro abeda nga rindihe ya, ni amánga sunge na ni ni ome susi; ono tatamana rengbe ka uhda boro ka dia be pai.

¹¹Ka wo de boro mbata ni nikazoga ru, wenepai adu nga ti ni fu bazogo ru te.

¹²Agu apai nakura ngba iratatamana yo du na undahe fu ni, ono ngba iramungo ambira ni ambira dũ.

¹³Gu tonatona apai ngbani ape nga kina mumungo apai; digida gani fugo nga kina kere pa waka.

¹⁴Irangbaangbaa nangeesa fugo a, ka boro avura nga ina gu pai nikadu ya, da rengbe ka gumba gu pai fu ni nikadu ti ngba fuo ni?

¹⁵Gu sunge nga ga iramungo nambusa kina ni, ka ni aina nga pa waĩ ndu gene ku bakporo yo ya.

¹⁶Ako ringara! Na gberẽ he foro, ho du ga bakindo ni ni gude, gamo awiri bakindo ki niri pumbo wiso!

¹⁷Ako ringara! Maku dú foro, ho du ga bakindo ni ni wiri irakporo, gamo awiri bakindo ki niri pumbo ti ragoho, tipa du na ome, tipa kpi buda te!

¹⁸Be mumungo sunge ri bambu nagboroka ti ni, na be nyomoro mai natoga ri bambu yo ti ni.

¹⁹I nimangi pumbo tipa mongo, imekakue ki ningiisi unga aboro, marã nakaraga pai tipa apai dunduko.

²⁰Ka mo gbérẽ nga ngbaro yo fu bakindo ya, zavura rogo ga berã vurũ, ka mo gbérẽ nga ngbaro yo fu irakumuko bamburame yo ya; bambiko zire ari andú na fugoro, watadu agu ra du na apupora ki gumba gu pai re.