Read zande Batungusipai 2 Bible Online

Batungusipai 2 - zande bible

Batungusipai 2

¹Mi aya ku kpotore yo, “Mo rú nga, mi aásada ro na pa ngbarago; mo dú na ngbarago ti ro.” Mo ngére, gere adu ni kina kungba pai tigaha a.

²Ya mi tipa mongo, “Si nga mumungo pai,” na tipa ngbarago, “Gini he si amanga?”

³Mi awisigi pai rogo gi berã waĩ ka borore du zaza be imekakue ― gi berã ki nindu na mi kindi na tatamana ― na waĩ ka mi bi pa ngbaangbaa, daho ka mi bi gu wenepai ni du tipa awm aboro i nimangi he tii ngbangbaturũ no ti rago ungayo dunduko.

⁴Mi amangi bakere asunge; mi adudua abambu ki rũ abakakue tipa re;

⁵mi ki mbakadi aati tipa re na ba babanda angua a, mi ki rũku angbatunga agu angua yo dunduko nazuka.

⁶Mi ki mangi amunga ime ni gimi ka tuda gu bire na ni yo angua naida ni.

⁷Mi angbe akanga nga akumba na ade a, ki du na akanga i avunga yo kina kpure. Mi adu a na dungu zogozogo anya be re na rimbasa akandoro a, ki susi agu yo naadu mbata fere Yerusarema yo.

⁸Mi adungura feda na dahabu a ni gimi, na gu kikiipa aũkumuko du ku abakindo yo, na ga aringara. Mi ki du na abayango nga akumba na ade a, adebadia adu be re ni badungu yo, na agu ahe ngba bangiri awiri aboro.

⁹Si du mi adu ti ni ni bakere boro, pa re ki kii akia ki susi agu yo naadu mbata fere Yerusarema yo; gi tatamana a ki nye na kina re.

¹⁰Agu ahe dunduko bangire akpi nyemu he mi aka nga na ni be he te. Mi aza nga ngbadure yo tipa gu ngbarago sa a te, bambiko ngbadure yo angi mbiko gi sunge dunduko; gere ki du ni gi mosoro rogo gi sunge dunduko.

¹¹Mi dgimi ki niberẽ pa agu asunge dunduko bere amangi, na gu gi ome mi abagi he ni manga mi sunge, oni ngére, si adu dunduko ni kina kungba pai na wa pa peka fuo yuge, a nga u ho tii uru no te.

¹²Mi ki aria tire ka berã pa tatamana na pa mungo na pa ngbaangbaa; bambiko gini pai rengbe gu boro ka manga ha naye fuo bakindo? Nga kina agu apai ni naima manga.

¹³Si du mi tigimi abi he nga tatamana ngba ti ngbaangbaa, wa ngba imarago ti bitimo.

¹⁴Bangiri iratatamana du rini yo, ono mumungo boro nata rogo bitimo; ono mi ki ini he ya pai sa naye sa yo dunduko.

¹⁵Mi ki ya ku kpotore yo, “Gu pai namanga fu mumungo boro, wo si akamanga fere; tipagine tie mi adu ti ni ni iratatamana ki susi?” Mi ki ya ku kpotore yo gere nga kina kungba pai a.

¹⁶Bambiko pa iratatamana na pa iramungo, i atingida nga ha nye anye kindi te, wa du he ya ti agu arame nikaye bangirise agó ti yo dũ. Ako! waĩ iratatamana nakpi wa kina iramungo!

¹⁷Si du mi asogo unga ti ni, bambiko gu sunge i amanga tii uru no adu na kina imisiripai fere; si dunduko nga kina kungba pai na wa pa peka fuo yuge.

¹⁸Mi ki sogo gu gi sunge mi amangi tii uru no, wa du he ya mi ambú he fu gu boro nikadufuore.

¹⁹Da ini he watadu ni adú ni iratamana watadu ni adú ni irangbaangbaa? Ono ni azóga agu ahe dunduko mi amangi he na agu apai mi ayugu gi tatamana rogo tii uru no. Gere a nga kina kungba pai.

²⁰Bambiko wa du he ya ni gu rago boro nimbu gani sunge dunduko ni amangi ni tatamana na inahe, nga gu ni au rogo ho a, fu gu boro namanga nga sunge he ya si du ni gani, si du mi asa tire ti ni ka fu ngbadure yo sa mbugo berã tipa pa agu asunge dunduko mi amangi tii uru no. Gere a nga kina ku ngba pai ni gbigbitapai a.

²²Bambiko gini he du be boro tipa gani asunge dunduko na gani mbugo nga gu ni amangi tii uru no?

²³Bambiko gani arame dunduko du na kina imisiripai, gani sunge ki ngia rungosi; ii, zavura yuru gani berã aongoda nga te. Gere a nga kina kungba pai.

²⁴A nga he ho ngba fu boro susi gu pai nga ni ta ri he ni mbiri he, te, rago ki ningba angba ti ni mbiko gani sunge. Mi abi gere a, ya si aye be Mbori.

²⁵Bambiko da rengbe ka ri he watadu ka du na pa ngbarago kpara ti ko?

²⁶Bambiko Mbori nafu tatamana fu gu ni nangba ti ko, na inahe na ngbarago; ono ko nafu iimi sunge fu aboro ingapai, ni dungura ahe na ka iga ahe, ya ni fu he fu gu ni nangba ti Mbori. Gere a nga kina kungba pai na wa pa peka fuo yuge.