Read zande Batungusipai 3 Bible Online

Batungusipai 3 - zande bible

Batungusipai 3

¹Were ahe na regboho ti ni dunduko, rago du ho tipa apai ni ba sa sa dunduko tii ngbangbaturũ no:

²rago tipa vunga, na rago tipa kpio; rago rũka ahe, na rago kata agu ahe i arũku he;

³rago imo he, na rago husa he; rago kua he ku sande, na rago dua he ku ari;

⁴rago kpara ni aume, na rago mongo; rago kpara ni ta ngbaduse, na rago dogbere;

⁵rago ba mbia ku sa yo, na rago dungura ambia; rago dungotise, na rago nyagatise ti dungotise;

⁶rago gbata he, na rago ingisa he; rago banda he, na rago bafa he ku sa yo;

⁷rago sipa he, na rago runga he; rago onga kii, na rago fura;

⁸rago nyemuse, na rago sogote; rago tipa sovura, na rago tipa zereda.

⁹Gini u du fu gu boro be gani sunge ni namanga ha?

¹⁰Mi bi gu sunge Mbori afu fu awiri aboro i nimbu be manga ha.

¹¹Ko amangi ahe dunduko ni bawenehe ti ragoho. Ko ki moi nyenye apai a ku berã boro yo, ono ka boro aréngba nga na ina gu mangaapai Mbori amangi ti tonatona rago dati digida ha ya.

¹²Mi ini he ya he ho ngba fu yo susi ngi mbaro, na ka manga gu pai ngba ti yo wa du yo ni ungayo te.

¹³Ga Mbori gamahe fu aboro ni ba sa sa nga ri riahe ki mbiri he, ki du na ngbarago ti ni rogo gani sunge dunduko.

¹⁴Mi ini he ya agu apai dunduko Mbori namanga ha si anyé anye kindi; ka i gbia nga he kuti ni te, ka i di nga he ti ni a te; Mbori namangi he wo, ya aboro nigunde bara bangiriko.

¹⁵Gu he du ho, si aima du; na gu nikadu, si ima du a; ono Mbori nagbata kina gu nasusi ku sa yo.

¹⁶Ku ri agi apai re mi abi pai tii uru no nga ba ruru sarangbanga, gbegberẽpai adu kina yo, na ba rurupai, gbegberẽpai adu kina yo a.

¹⁷Mi ki ya ku kpotore yo, Mbori asára ngbanga ruru aboro na gbegberẽ aboro, bambiko ko ringbisi rago tipa apai ni ba sa sa dunauko na tipa mangaapai a ni ba sa sa.

¹⁸Mi ki ya ku kpotore yo, tipa pa awiri aboro, nga Mbori naasada yo i ini he ni tiyo ya i wa kina anya.

¹⁹Bambiko gu pai namanga awiri aboro si namanga anya a; wa aboro nakpi, kina wo anya nakpi a. Onga ti yo na gaami kina sa, pa boro asusa nga ga anya te; bambiko si dunduko nga kina kungba pai.

²⁰I nandu dunduko kina ku rogo ba sa. Aboro na anya aenge kina nvutu yo, i na ami nandu dunduko berewe ku nvutu yo.

²¹Da ini pa toro boro nga si naga ku ari yo, na pa toro nya si naga ku sende yo?

²²Si du mi aini he ti ni ya a nga he ho ngba susi ti gu nga boro ka ngi rogo gani sunge te, bambiko gure nga gani he; bambiko da rengbe ka ye na ni ni bi gu pai nikadu ti ngba fuo ni no?