Read zande Batungusipai 5 Bible Online

Batungusipai 5 - zande bible

Batungusipai 5

¹Si du mo ka banda nduro ti ni ho mo ka ndu ni ku rogo ga Mbori bambu yo; bambiko ka mbeda koyo ka gia pai ngba ki susi ti fu motumo nga ga airamungo; bambiko i aina nga ha ya i namanga gbigbitapai te.

²Ka mo gbá nga sa pai ni ngbaro ya, ka ngbaduro ípisi nga tihe ka gumba pai ku bangiri Mbori a ya, bambiko Mbori du ngbangbaturũ yo, mo ki du auru kpotosende no; si du ka ga pai dú ti ni ni kina umba ha.

³Bambiko musumo naye na badungu ambugo, fugo iramungo ki du na dungu apai.

⁴Ho kido mo kidohe ni fu Mbori, ka mo ímasi nga pa fu he ya; bambiko rago angba nga ti ko tipa airamungo te. Mo fú gu he mo akido pa ha.

⁵Gu pai ngba ka mo kido nga he ya ti pa kido he ka mo afu nga ha ya.

⁶Ka mo mbú nga ngbaro si gbe ro sa ingapai ya, ka mo yá nga fu ga Mbori moyambu gure adu ni irairapai a ya. Tipagine Mbori ka zinga ti ni tipa fugoro, ka gbarasa sabero?

⁷Were ho du dungu amusumo ni, kungba apai nange a wo: ono mo tigamo gúnde ti Mbori.

⁸Ka mo bi he ya i narungosi rungorungo boro rogo gu ringara airazuu ki di sarangbanga ku sa yo na rurupai, ka si iriwo nga ti ro ya; bambiko boro ho susi gu ni nabi he, ono agu yo kina ho berewe kii pa yo ki susi yo du.

⁹Ku ri agi apai re dunduko gu u nga ga gi kpotosende re si tipa aboro dũ, bakindo ni tiko i namanga pa ko na kina aũati.

¹⁰Gu ni nakpi nyemu marã, marã anyasa nga gani nyemuhe te; watadu gu ni nakpai nyemu badungu ahe na mokiisa ku ri he: gere nga kina kungba pai a.

¹¹Ho ahe nazuga ni, agu yo nazuga a nari he; gini u du rogo ho fu iraha, fuo kina bi he ni bangirini?

¹²Ga boro sunge rame, si ni wene he, watadu ni nari riahe toni watadu ni bakere he; ono gu hibepai nga ga irakumuko aka na rame be ni.

¹³Kere gbigbitapai ho nga gu mi abi tii uru no: nga aũkumuko nga gu iraha abanda sa gani ima,

¹⁴agu aũkumuko re ki gberẽ be gu pai angba nga ya. Ka ngia ni abatika kumbagude, ka he adu nga ho be ni ya.

¹⁵Wa ni akuru rukumbu nani yo kundiri kina wo ni ka ga wa ni aye, ni aga nga na u gani sunge, nga gu ka ni atindi ku sa yo te.

¹⁶Gere a nga kere gbigbitapai, nga wa ni aye, ni ga kina wo a. Gini u du be ni wa ni amangi sunge fu yuge,

¹⁷na wa gani arame dunduko ni nara ha si kina rogo bitimo yo, ni naegera ni kere he ki du na kaza na zinga a?

¹⁸Oni ngére, mi tigimi gu pai mi abi he ni wene he, ngba fu boro nga ka ri he na ka mbiri he, ki du na ngbarago ti ni rogo gani asunge dunduko, nga gu ni amanga tii uru no, rogo agu arame dunduko nga ga ungani, nga gu fu Mbori fu ni, bambiko gere nga gani mosoro.

¹⁹Agu aboro ni ba sa sa Mbori afu aũkumuko fu yo na aukumuko, ki fu tandu fu yo tipa ri he a, ka bi gayo ahe ni tiyo ka ngi rogo gayo sunge ― gere a si nga gu gamahe nga ga Mbori.

²⁰Bambiko i atingida nga pa gayo gbanga rame te; bambiko Mbori naunda yo kina rogo gu ngbarago du ku kpotoyo yo.