Read zande Batungusipai 7 Bible Online

Batungusipai 7 - zande bible

Batungusipai 7

¹Wo wene rimo boro ngba susi kikiipa furũ nzeme; na rago kpio ni ti rago vunga boro.

²Si ngba ka ndu ku kporo kpe yo ti ndu ku kporo pumbo yo; bambiko gure nga digida ga aboro pai dunduko, agu yo du ni ungayo aberã pa ha ku kpotoyo yo.

³Rungo ngba ti mongo; bambiko rungo ti kpakpuse namanga kpotoyo pusiapusia.

⁴Kpoto iratatamana yo du ku kporo kpe yo; ono kpoto iramungo yo du ku kporo ngbarago yo.

⁵Si ngba fu boro ka gia ga airatatamana zahe, ti dega tuni sa ga airamungo bia.

⁶Bambiko wa woro gbigbi kiwe tii mburu pere yo, wo du mongo mumungo aboro; gere a nga kina kungba pai.

⁷Rungosi boro nasa iratatamana wa mumungo boro ni rengo, marã mabirimo nagbarasa pa rugatinapai.

⁸Digidapai ngba ti tonatona ha, du ni irahipai rogo toro yo ngba ti du ni irakiisapatise rogo toro yo.

⁹Ka mo gbá nga sa zinga ya; bambiko nye zinga anye ku kpoto airamungo yo.

¹⁰Ka mo yá nga, “Gini pai bambata arame angba ti ni gbe ti agi arame re?” ya. Bambiko mo asana nga he ni tatamana tipa gi pai te re.

¹¹Du na mosoro gbia kuti tatamana ngba, ii, ngba ha angba susi fu agu yo bi uru.

¹²Bambiko tatamana nabanda boro a wa marã nabanda boro; ono gu pai ngba inahe ti ni susi si nga tatamana nabanda unga gu ni du na inahe.

¹³Mo berẽ pa ga Mbori sunge; da rengbe ka ruga gu he ko amangi ni nuganuga ha nzunzu?

¹⁴Rago kumuko mo dú na ngbarago, ono rago rungo mo bérẽ pa gi pai re nga: Mbori mangi gu rago na gu kura ha a, ka boro abi nga gu pai nikadu ti ngba fuo ni no ya.

¹⁵Agi apai dunduko re mi abi rogo gi rame kungba pa unga; ruru boro ho nakpi kina rogo gani rurupai, gbigbita boro ho ni narasa ungani kina rogo gani gbigbita mangapai.

¹⁶Ka mo dú nga ni ruru boro susi ya, ka mo sá nga tiro ni iratatamana susi a ya; tipagine ka mo agbárasa tiro ti ni?

¹⁷Ka mo dú nga ni gbigbita boro ki susi ya, ka mo dú nga ni iramungo a ya; tipagine ka mo kpi ti ni mbata fu gamo arame?

¹⁸Si ngba mo ka kuti gere nyanyaki, ka mo zá nga bero ti ni ya; bambiko gu ni nagunde ti Mbori nikakura rogo agi apai re dunduko.

¹⁹Tatamana nafu ome fu iratatamana susi ti abazogo bawe du rogo bakporo.

²⁰Ni rengo a nga ruru boro auru kpotosende no namanga wenepai, zanga manga ingaapai te.

²¹Ono ka mo dége nga turo tipa agu apai aboro agumba dunduko ya, mo ka gia fugo ga moyambu ni nisenge ro.

²²Mo ini he ku kpotoro yo mo ni tiro kina wo senge mo kura aboro bara sa a te.

²³Agi apai dunduko re mi awisigi he be tatamana; mi ki ya, “Mi adú ni iratatamana”; ono si adu ti re tuturũ.

²⁴Gu du ho, si du tuturũ, si dungura adungura ki susi; da rengbe ka bi he?

²⁵Mi asa tire ka maa gi berã ka ina pa tatamana na ka wisiga ha, na ka gbata ha na pa ndu apai, ka ina gu gbigbitapai nga pa mungo, na gu mumungo pai nga pa waka.

²⁶Ono mi ki bi he ya gu de du kpotori yo na nzingiri pai na apio, na aberi wa kina azogbo, ri wa kina nirãnirã he susi kpio. Gu boro angba ti Mbori ni naora be ri, ono ri nazia boro ingapai.

²⁷Oni ngére, wo poi Batungusipai, gere mi abi he, ki nitangara pai kina ku ri gu kura ha ka ina waĩ du he dunduko,

²⁸nga agu apai kpotore yo agbata ha kindi, ono mi abi nga ha te. Mi abi kumba sa dagba akumba 1,000, ono dagba ade yo dunduko mi abi nga ni yo sa te.

²⁹Oni ngére, kina gere mi abi, ya Mbori amangi aboro ni ruru yo, ono i ni tiyo nagbata dungu sangisangi apai.