Read zande Batungusipai 9 Bible Online

Batungusipai 9 - zande bible

Batungusipai 9

¹Pa agi apai re dunduko mi aberẽ pa ha kpotore yo, ka wisiga pa ha dũ, ya ruru aboro na airatatamana a na gayo mangapai a si kina be Mbori; watadu ka si du ni nyemuse watadu sogote, boro aina nga ha te. Si nga kungba apai dunduko ku bangiriyo,

²wa du pai ho sa naye tipa aboro dunduko, fu ruru aboro na fu gbegberẽ aboro a, fu wene yo na fu gbigbita yo a, fu gigiri yo na fu Dirikobiriko yo a, fu gu ni nafu motumo na fu gu ni afu nga motumo ya. Wa du wene boro, kina wo du boro ingapai; gu ni nazunga he ni wa kina gu ni nagunde ti zungahe.

³Gere nga kina gbigbitapai rogo agu apai dunduko i namanga ha tii uru no, ya pai ho sa naye tipa aboro dunduko; kpoto wiri aboro yo dunduko hi be gbigbitapai a, mungo ki du kpotoyo yo ho du yo ni ni ungayo, fuo gure i ki ndu koyo du kpikpi aboro ni.

⁴Ono gu boro du ni kpamiakpamia ni na unga aboro d unduko ni du na maabangirise, mbiko unga ango ngba ti kpikpi bahu.

⁵Bambiko agu yo du ni ungayo i ini he ya i akpí akpi, ono kpikpi aboro aina nga pai te, kura mosoro du nga fu yo a te; bambiko tingida payo ima go ti aboro.

⁶Gayo nyemuse ima kpi na gayo sogote na gayo kpihe a, ka bete he adu nga fu yo berewe rogo gu pai namanga dunduko tii uru no ya.

⁷Mo ndú, ka ri ga riahe na ngbarago, ki nimbiri ga imekakue na ngbarago kpotoro yo; bambiko Mbori ima ida pa gamo mangaapai.

⁸Gamo aroko dú ni pusi he na uru dunduko; ka mo mbú nga mbeda riro na nzeme ya.

⁹Mo niráki na diaro na ngbarago mo akpi nyemu ri, rogo agu arame dunduko nga ga ga kungba pa ungaro Mbori afu he foro tii uru no, bambiko gure nga ga bete he rogo ungaro na rogo ga sunge mo amanga tii uru no.

¹⁰Gu pai bi mo ka manga ha ni bero, mo mángi he na omero; bambiko sunge rogo Baatoro kpikpi aboro yo yo mo andú ku ho ni te, berãpai na inahe na tatamana a te.

¹¹Mi abi kura pai tii uru no berewe, nga mosoro ho fu gu ni naora ni ipo te, watadu susa na vura fu nyanyaki boro a te, riahe ho fu iratatamana a te, akumuko fu aboro rugatinapai a te, irisa fu tatamana aboro a te; ono rago gbia kuti mamu namanga fu yo dú.

¹²Bambiko boro aina nga pa gani rago a te. Wa kina agu atio i nazia ra na pio, wa agu azire i nazia ra ti gbina, kina wo du wiri aboro rago gbegberẽ rago, ho si nizi yo ni rure.

¹³Mi abi gi pa tatamana re a tii uru no, si awiri bakere pai bangire.

¹⁴Wiri toni bakporo adu ho na kina zogoro aboro rogo ho; bakere bakindo ki ye na vura kuti ni ki kisi genehe, ki fo bakere kanda kuti ni.

¹⁵Ono i abi rungorungo boro tatamana yo sa, be gako tatamana ko abatasi gu bakporo re. Ono a nga boro sa natingidi pa gu rungorungo kumba te re.

¹⁶Ono mi niya tigimi tatamana ngba susi ti ome, ka i vura payasi pa ga rungorungo boro tatamana apayasi vurũ, ka i agia nga gani apai a ya.

¹⁷Agu apai gumba iratatamana ha yee, gi yo ho, si ngba ti gu paa ku ari nga ga bazogorago dagba mumungo aboro.

¹⁸Tatamana ngba susi ti aũsovura, ono boro ingapai sa nagbarasa dungu weneapai.