Read zande Ga Soromo Bia 2 Bible Online

Ga Soromo Bia 2 - zande bible

Ga Soromo Bia 2

¹Mi nga mbumbudahe wa ga kundu badari Sarona yo, wa ranga angboongboorago yo.

²Wa ranga dagba akiwe, wo du badiangbare dagba paranga ade.

³Wa ngua du wa manga dagba angua bire, wo du gu ko mi akpi nyemu ko susi dagba paranga akumba. Mi asungu tii kirima ko na bakere ngbarago, gako zuzuhe ki nziri anzira ngbare.

⁴Ko ki ye na mi ku bambu pumbo yo, gako bendere ku ri re angia nyemuse.

⁵Mo mbísi re na kpura ugu rindi bakakue, ki ungasi re na zuzu ngua du wa ga manga; bambiko kaza nyemuse namanga re.

⁶Ako, ka garebeko adu tii rire, kumbabeko ki dungo re a!

⁷Ako wiri aboro Yerusarema nga ade, mi zunga he fu roni, ti rimo agbangbaria na anzungba nvuo yo, ka oni ya wó nga ti nyemuse ki zingisi he a ya daho si ka ngba ni.

⁸Fugo gu ko du mi akpi nyemu ko susi! Oni ngére, ko naye, ni guku ri abaagangara, ki niguku nzuda ri abaagangara.

⁹Gu ko mi akpi nyemu ko susi ko du wa gbangbaria, watadu wa paranga nzungba. Oni ngére, ko naru gii gaani bambu yo ti vuroho, ki ningere ku dimoyo ti bangiri bambu, ki nimoi bangiriko ti kpuguruhe.

¹⁰Gu ko mi akpi nyemu ko susi nafu ki ya fere; “Ako badiangbare, mo gúari ku ari, gu mo ngba ti re gbe, ki ye ku sa no;

¹¹bambiko mo ngére, rago zerarago susi, regbo mai nyasi.

¹²Mbumbudaahe nakura auru kpotosende, rago bi azire bia da, bambiko i nagia paa gbungu rogo gaani ringara.

¹³Vurumo nazuka zuzuhe, bakakue nambumba; si nakusa wene fuõhe. Ako badiangbare, mo gúari ku ari, gu mo ngba ti re gbe, ki ye ku sa no.

¹⁴Ako gi mbipo, du dagba sapusapu ambia yo, rogo siimbia nyanyaki ba yo, mo ídi he fere mi bi kpakpuro, mi gí fugoro a, bambiko ngba fugoro angba ni rengo, ngbanya kpakpuro ki ngba a.

¹⁵I zi awaru fu rani, rukutu awaru, nga agu ra nagbarasa pa aati bakakue, bambiko gaani aati bakakue nambumba.”

¹⁶Gu ko mi akpi nyemu ko ko nga gimi ko, mi tigimi nga gako ri, ko nariga gako rimbasa akandoro dagba aranga.

¹⁷Mo sá tiro, gu mo mi akpi nyemu ro, ki du wa gbangbaria, watadu wa paranga nzungba ri nyanyaki abaagangara, daho rago ka gira ni nzereme ki ga ku sa yo.