Read zande Yesaya 11 Bible Online

Yesaya 11 - zande bible

Yesaya 11

¹Ono tomohe akura ti rukurumo Yisai, be ngua mkakura ti atarãko.

²Ga Yekova Toro anye ri ko, gu toro nga ga tatamana nga toro rugatinapai, nga toro rugapai nga toro tandu, nga toro inahe nga toro gunde ti Yekova

³Gako ngbarago adu rogo pa gunde ti Yekova. Ko asápa nga ngbanga kuti bi pai ni bangiriko te, watadu za pai mbiko gia pai ni tuko a te;

⁴ono ko asára ngbanga rungorungo aboro na rurupai, ki za pai nzunzu ni ruru sarangbanga fu bayee aboro auru kpotosende; ko atáka kpotosende na ngbondo ngbako, ko aímo gbegberẽ aboro ni gu omeonga nakura ngbako yo.

⁵Giri dimoko nikangia rurupai, giri kpoto dimoko nikangia yososopai.

⁶Waru asunga na wiri kandoro, mama api sande pati wiri meme, wiri bagara adú wa sa na wiri bahu na nzenze wiri nya a, kina win gude angbe fu ra ku mbata yo

⁷Nabagara ari he wa sa na gu nya nga urisi; awira apika sande wa sa; bahu ari kazimorú wa babagara.

⁸Gude ngbamai angi ti ngba yaro wo, gude mbumai ki moi beni ti ngba yaro kere wo.

⁹I aimisa nga aboro watadu gbarasa yo ri gi kparakpara ziazia gangara wa sa te; bambiko kpotosende ahi be ina pa Yekova wa aime nahisa gango baime.

¹⁰Ti gu rago re tarã Yisai arú ni yuguyugupai fu aboro; arikaaboro agbata ko, gako baongoda adu na taarimo ti ni.

¹¹Ti gu rago re Yekova atáá beko berewe ni ue he ka karaga yangara gako aboro nga agu yo nanye, du Asura yo, na Ezipeta yo, na Paterosa yo, na Etiopia yo, na Erama yo, na Sinara yo, na Amata yo, na agu yo rogo agu aringara du ti ngba gango baime a.

¹²Ono ko akusa yuguyugupai tipa arikaaboro, ki dungura gu gbandakagbandaka yo nga ga aYisaraere yo, ki dungura gu gbandakagbandaka yo wa sa nga ga Yuda yo ti biama durugaduruga kpotosende yo

¹³Gu kpihe nga ga Efuraima aguari aguari, agu yo nazingisa Yuda i aróga yo aroga ku sa yo; Efuraima akpi nga Yuda berewe te, ka Yuda azingisa nga Efuraima berewe a ya.

¹⁴I agu wa zire ku pagorõ aFereseto ku dioyo, i amóngo gbarasi aboro ku uroyo. I atáẽ beyo kuti Edome na Moaba, aAmono agia sangbayo.

¹⁵Yekova agbárasa gu sorongasoronga baime du Ezipeta yo kpakaya; ko awó ti beko na gako fafoi yuge ku ri Di, ki kparaka ha ku rogo agenehe saba aboro ki nindu kina ri ugusende.

¹⁶Ono bagene adu mkaye Asura yo tipa gu yangara gako aboro naanye yo, wa si adu tipa aYisaraere ti gu uru i akuru ringara Ezipeta yo.