Read zande Yesaya 14 Bible Online

Yesaya 14 - zande bible

Yesaya 14

¹Bambiko nunga Yakoba adu ti Yekova, ko asia aYisaraere berewe, ki moi yo rogo gayo ringara, kungba aboro ki kodi tiyo na yo i aka kuti gu ngbatunga nga ga Yakoba

²Aboro aroga yo ki ye na yo ku ba yo yo, ono i adu ni ga ngbatunga aYisaraere yo rogo gu ringara nga ga Yekova, tipa du ni akanga nga akumba na ade a; i aróga agu yo ni zizi yo nga agu yo naazi yo mbata, i azóga abarungosi yo.

³Ho Yekova ka fu ongoda ni foro be ga rungo na be ga fudifudipai na be ga nyanyaki sunge nga gu i amoi ro ti ni mo nimangi he,

⁴mo ka pe pa gi sanza re kuti bakindo aBabera, ki ya: “Waĩ ongodi barungosi aboro? bakporo dahabu ongodi a!

⁵Yekova kuadi ga gbegberẽ aboro ngau, gu ngau nga ga abazogo,

⁶nga agu yo nata aboro ni dingi dingi ngbaduse na nyenye kpata, nga agu yo nazoga arikaaboro ni zinga na gu rungosi ka boro sa aza nga ha ya

⁷Kpotosende dunduko naongoda du he adu zezeredi; i tona bi bia ngbarago

⁸Agu angua nga kupuresa nangi foro, na akedara nga ga Rebanona, naya, ‘Wa i aba ro ku sande, badengua aye nga sa rani te.’

⁹Baatoro kpikpi aboro tii kpotosende yo gbisi ka gbia ro mo niye, si nawo ti kangba aboro i nipoi kuti ro, nga kina gu bakikindigi yo dunduko nangia ga kpotosende yo; si atumba agu abakindo dunduko nangia ga rikaaboro yo ri gayo ambatabakindo

¹⁰I dunduko akáraga ha ki ya foro: ‘Mo sa tiro ni rurungbura ro wa kina rani! Mo sa tiro ki du wa kina rani!’

¹¹I zogosi ga ũenda ku Baatoro kpikpi aboro yo, na woro gamo asagiru; agbirẽ zu ku tii ro yo, asooro ki dadi ro wa roko.

¹²“Ako Kerekuru Uru, wiri wiso, Ti mo ngbangbaturũ yo! de yo ro ku sende, nga gu ni rungburasi arikaaboro!

¹³Mo aya ku kpotoro yo, ‘Mi adákpa ku ngbangbaturũ yo; mi akiisa gi mhatabakindo ku ri agu akerekuru nga ga Mbori ra; mi ki sungu ri bagangara nga ga dungurati, rogo gu tuturu papara rago du ku nodiyo;

¹⁴mi adakpa ku ri tuturu adubo yo, mi adú wa gu Ko nga Bahe ki susi.’

¹⁵Ono i zogosi ro ku Baatoro kpikpi aboro yo, ku dudungura Due yo.

¹⁶Agu yo bi ro i adúa bangiriyo ti ro kindi, i abérã pa ro, niya: ‘Gi kumba re ko nga gu ko namangi kpotosende si kio? nga gu ko naazigizo angbi,

¹⁷naamangi zegino wa ngbakungba ki gbarasi agu abaakporo nga gaha, nakusa nga gako zizi aboro i ga ku kpuyo yo ya?’

¹⁸Abakindo dunduko nga ga arika aboro yo, i dunduko naraka rogo taarimo, i ni ba sa sa ki du kina murãyo yo;

¹⁹ono i ba ro ku sa yo ti ga murã wa gbegberẽ bengua, ukadi yo ro na kangba aboro, nga agu yo i aimi yo na basape, nga agu yo nandu sa agu ambia nga ga Due, wa gu kangba i msimbi he ni ndue

²⁰Mo akóda nga tiro na yo rago kpisida boro te, bambiko mo gbarasi ga ringara, mo imi gamo aboro. “Gu ngbatunga nga ga amangi, gbigbitapai ka i ayamba nga rimoyo nye anye kmdi ya!

²¹Oni mbakadi kpio tipa awiriko tipa gu irairapai nga ga atitayo, ya ka i gúari nga ku ari ka dia kpotosende ni gayo ya, ki hisi zegino na abaakporo a ya.”

²²“Mi aguari ku an kuti yo”, wo poi Yekova nga ga arimbasa ko, “ki di rimo ti Babera ku sa yo na yangara aboro a, awiriyo na awiri awiriyo a, wo poi Yekova.

²³Mi asa ha ni maga anzmgini, ni amunga ime, mi awega ha ni wirá gbarasahe, wo poi Yekova nga ga arimbasa ko.”

²⁴Yekova nga ga arimbasa ko zunga he, niya: “Ni rengo wa berẽ mi he, wo si ka ye ka du, na wa berẽ mi pa ha, wo si ka ru,

²⁵ya mi akúadi aAsuro rogo gi ringata, ki simbi yo ri gimi abaagangara yo ku tii ndure yo; si du ga Asuro gonga ka guari ti ni ti a Yudo ku sa yo, gayo tindiro ki guari pagorõyo a.”

²⁶Gere nga gu berápai mi aberẽ paha tipa kpotosende dunduko; gere nga gu be tai tiru ku ri arikaaboro dunduko

²⁷Mbiko Yekova nga ga arimbasa ko berẽ pah i wo, da nikadingisa ha? Beko du ni taĩtaĩ he, da nikamina ha?

²⁸Ti gu garã Bakindo Aza akpi, gi pa rungo adu re:

²⁹“Ako aFereseto, oni dunduko, ka oni ngí nga ya, bambiko gu ngbondo naataka roni si kuadi, bambiko ti kina wo, kere wo ka kura ni, zuzu ru adu ni kere wo nagu agu.

³⁰Bambata vungu nga ga rungoru ngo aboro ari riahe, airazingohe api sande zezeredi; mi aímo tarãro ni ngbongi, mi aimo ga yangara aboro

³¹Ako ngbadimo bakporo mo yóro wawa; Ako bakporo, mo kpan; Ako aFereseto, oni dunduko oni ziziri! Mbiko ngime naye nodiyo, a nga boro sa ye ku sa yo dagba gako ringbisiringbisi aborosovura te.”

³²Gini pai tie boro ka karaga fu agu amokedi nga ga arikaaboro yo? “Yekova dua Siona, gako rungosirungosi aboro gbu ku rogo ho.”