Read zande Yesaya 16 Bible Online

Yesaya 16 - zande bible

Yesaya 16

¹Oni kedi wiri akandoro fu bazogo nga ga gu ringara, tona Sera yo du ngbakungba yo, dati gu bagangara nga ga aboro Siona.

²Wa agu azire nayanga ayanga, wa gbandakagbandaka fogo awiri azire, wo du agu awiri Moaba nga ade du ti agu abasigo du Arenona yo

³“Mo fú rugute, mo sari sarangbanga; mo mángi kinmaro wa yuru ti bebere uru; mo dádi gbandakagbandaka yo, ka mo kúsi nga merẽmeré boro ya;

⁴Mo idi he fu ga Moaba gbandaka gbandaka aboro i raki dagba roni yo; mo dú ni bagbuko fu yo be bagbuahe. Ho airabiriki ka nyasa ni pa gbu ahe ki nyasia, na gu ni nasimba aboro ku tii ndu ni yo ki guari rogo ringara a,

⁵i anyákasa pa mbatabakindo rogo inapai boro asunga auru he rogo rengo yo, rogo gu bamburoko nga ga Dawidi; nga gu ni nasara ngbanga ki nigbata ruru sarangbanga ki niipisi tini ka manga rurupai.”

⁶Am gi pa gu ruka nga ga Moaba, ya ko adu na bakere ruka; na pa gako knsapa tiko a, gako pa ruka, na gako dingidingi ngbaduse― gako abiatise a si gbua.

⁷Si du Moaba ayora wawa ku ri Moaba, aboro ni ba sa sa niyoro wawa. Oni kpári ni rungo ni rungosirungosi roni kpakaya, tipa gu zozo kpokuta du na rindi ngua rogo ho du Kira-resete yo.

⁸Bambiko agu aati du Esebona yo runa, na gu bakakue du Sibema yo; agu agbia nga ga arikaaboro yo kuadi wene siasia abehe ku sande, nga gu nadu ku Yazere yo a ki ndu ku rogo ngbakungba; abehe akparaka tuturu ki yari ri baime a.

⁹Si du mi nakpára na gu kpe nga ga Yazere tipa gu bakakue du Sibema yo; Ako Esebona na Erare, aumere zirĩsi roni; mbiko gu tatangba nga ga vura ti ku ri gaoni zuzu ahe na ku ri gaoni keke ahe a.

¹⁰Du pusiapusia ki go ku sa yo na ngbarago rogo ati idiidi ahe; bika abia adu nga rogo ati bakakue yo te, na wene woro ahe a te; basimbi imekakue asimba nga imekakue rogo abapirãahe yo te; biasima ongo regbo pirã imekakue.

¹¹Si du kpotore yo napaa wa kundi tipa Moaba, na agu apare du kpotore yo tipa Kire-rese.

¹²Ho Moaba ka kura ni ni tiko, ho ko ka mbusa tiko ni ri batumbatumba rago yo, ki ye ku rogo gako kparakpara ba yo ka kpara, ko adía nga be he te.

¹³Gere nga gu pai Yekova agumba tipa Moaba ti agu arago nasusi.

¹⁴Ono awere Yekova gumba ha, niya, “Fuo agarã biata, wa agu agarã nga ga ngbe borosunge, gu taarimo nga ga Moaba adú ni payasipayasi he, zavura gako bakere rimbasa vuru, ono yangara yo adú ni kina umba yo gbua ka i anyáka nga ya.”