Read zande Yesaya 17 Bible Online

Yesaya 17 - zande bible

Yesaya 17

¹Gu pa rungo du tipa Damaseke. Mo ngére, i ambú Damaseke ti du ni bakporo, si adú ni guguda gbarasigbarasi ahe.

²I ambú agu abaakporo du Aroere yo; si adú tipa rimbasa akandoro, nga agu ra nikapika yo, a nga boro sa nikagundesi ra te.

³Gu nyanyaki gbata du Efuraima yo ki guari a, na ngbi Damaseke yo; gu yangara aboro ka du Suria yo i adú wa gu taarimo nga ga awiri aYisaraere, wo poi Yekova nga ga arimbasa ko.

⁴Si ayé ka du wa gere ti gu rago re ya i aúmbasi gu taarimo nga ga Yakoba, nzeme pasioko aúguda auguda.

⁵Si adú wa ho bakeahe nake nganu ni beko nandukuda boro zende he, wa ti gu regbo boro nadungura boro zende he Ngboongboorago Refaima yo.

⁶Ono i ambú bete futuhe yo, wa ti rago zigizo ngua eraya― zuzu he ue watadu biata ki nye ti behe tuturũ ku ari yo, biama watadu bisue ti agu abe ngua zu azu ku ari gbe, wo poi Yekova nga ga aYisaraere Mbori.

⁷Ni gu rago re aboro angéra koyo du Bamangiyo ni, i angéra na irisa koyo du ga Yisaraere Ziazia ko ni;

⁸i angéra nga koyo du abamotumo ni te, nga gu sunge nga ga beyo, i angéra nga na irisa sa gu he i amangi ni beyo te, ka ngia agu aAsera nga angbama, watadu duadua ambia ni kpia uru a te.

⁹Ni gu rago re gayo nyanyaki abaakporo adú wa agu aba mbu yo ho ambu bire ngua yo na ri bagangara yo, nga gu i ambu barangba awiri aYisaraere, ono si adú ni ngbakungba.

¹⁰Bambiko bangiro go ti Mbori nga ga bata, ka mo aberã nga pa gu Mbia nga ga ga bagbuko ya; si du, ka mo vura rú rúkurúku ahe vurũ ki ru he fu kungba mbori,

¹¹si ki funa ti gu uru mo aru he ti ni re, si ki mbumba ti kina gu wiso mo aru he ti ni re; ono zuzu he arúna aruna ti rago kaza na rago bakere imisiri rungo.

¹²Ako, gu gbarakagbaraka pai nga ga dungu aboro, nga gu napaa wa woro paa abaime! Ako, gu sumba nga ga arikaaboro, nga agu yo nasumba wa woro paa aime du na bakere ome!

¹³Arikaaboro asúmba wa woro paa dungu aime, ono ko azá yo, i aóra aora tuturu ku sa yo, i adánda yo wa yuge navuda umu ahe ri abaagangara, na wa gu bakamikami nvutu be bayuge.

¹⁴Mo ngére, nyemu pa gbudagbuda ki du! Mbata fu da wiso, i adu nga ho berewe te! Gere nga gu pai nga ga agu yo gbarasi rani, na gu pai nga ga agu yo gbu gaani ahe.