Read zande Yesaya 26 Bible Online

Yesaya 26 - zande bible

Yesaya 26

¹I abi gi bia re ni gu rago re ringara Yuda yo: “Ani du na nyanyaki bakporo; ko naringbisa bata tipa ha wa angapa na wa nyanyaki agbata.

²Oni zá angbadimo bakporo, ya ruru rikaaboro nga agu yo naka kuti rengo rimi koyo.

³Mo nabanda gu ko na ndikidi zereda, namaa gako berã ti ro, bambiko ko nakida kuti ro

⁴Oni kida kuti Yekova nye anye kindi, mbiko Yekova MBORI du ni nyenye mbia.

⁵Bambiko ko zogosi agu yo ku sande naaraka ku ari yo gbe, nga sosono bakporo Ko bafu he, ki zogosi he kina ku sande, ki ba ha kina boro ku nvutu yo.

⁶Ndue simbi he ku sande, nga ndu rungorungo aboro, nga ndu airazingohe a.”

⁷Gu pai nga ga ruru boro nga nzunzu pai; mo du ni ruru ro naruga gu gene nga ga ruru aboro.

⁸Ako Yekova, ani nasunguda ro, ngba gene gamo asarangbanga gu he mbisimorani akpi nyemu he nga kina rimoro na tingida pa ro.

⁹Nyemuro namanga mbisimore yuru ki susi, torore rogo re yo nagbata ro sirisiri. Bambiko ho du gamo asarangbanga ni auru kpotosende, araki rogo zegino nawirika pa turupai.

¹⁰Ka i vura yugo inapai fu gbegbere boro vurũ, ni ama nga pa rurupai te; ni amanga pai ni iraira ha ringara nzunzu apai yo ni abi nga gu taarimo nga ga Yekova te.

¹¹Ako Yekova, bero ni tumbatumba ha ku ari, ono i ata bi nga ha te. Mo idi he i bi ga kenapai tipa gamo aboro, i ki du na zee. Gu we du tipa avuraro si riti kina yo.

¹²Ako Yekova, mo aringbisa zereda fu rani, mbiko mo mangi gaani mangimangi apai dunduko tipa rani.

¹³Ako Yekova gaani Mbori, kura agbia azoga rani mbata nangia nga mo ya, ono ra ani fu kina rimoro sa

¹⁴I kpiki, i anyé nga ni ungayo te; i nga kangba aboro, i aguari nga te; si du bi mo yo ti ni ki gbarasi yo, ki nyasi pa tingida payo

¹⁵Ako Yekova, mo ngeesi rikaaboro, mo ngeesi rikaaboro; mo ni taasitaasi ro; mo kiisi pa abangbandarago nga ga ringara.

¹⁶Ako Yekova, i aye koyo du mo ni rago fudifudipai, i auko ho ga mbusa adu ni ku ri yo

¹⁷Wa de na gude, du rogo imisiri ki nikpari ku ari be gari ima, nga gu ri rago gari vunga ambeda, wo ani adu ku bara bangiro, Ako Yekova;

¹⁸ani adu na gude, ani adu na imisiri, ani ki vungu si ki du wa kina yuge. Ani amanga nga pa bata rogo kpotosende te, araki rogo zegino ati nga a te.

¹⁹Gamo kangba aboro adu ni ungayo, kangba yo azinga. Ako oni nga araki nvutu yo, oni zíngi ki nibí bia ni ngbarago! Mbiko ga ndomo adu wa ndomo imarago, mo aida ha si ti ku ri ringara kangba aboro.

²⁰Oni yé, gimi aboro, oni rimi ku rogo gaoni abambu, ki kisi gaoni anghadimo fuo ro: oni óko tironi ngbutuko toni daho pa imisiri ngbaduse ka susa ni.

²¹Oni ngére, Yekova nakura rogo gako ba yo ka mbusa araki auru kpotosende tipa gayo irairapai, kpotosende akúsa pa gu kure i auka ha ku auru he, si adáda nga gaha akangba berewe te.