Read zande Yesaya 27 Bible Online

Yesaya 27 - zande bible

Yesaya 27

¹Ti gu rago re Yekova ambusa Nyaime nga gu baipiipi wo re, nga gu Nyaime nandu ngberengungberengu, ko aimo Nyaime du wa kiki kpaka du baime yo.

²Ti gu rago re: “Bawene ati bakakue adu, oni bi bia tipa ha!

³Mi nga Yekova, mi du ni babanda ha; mi natuda ha na arago dunduko. Mi nabanda ha yuru na uru; boro ka imisa ha.

⁴Ngariangaria zinga rogo re yo te. Ako ka anguruza na akiwe azingi kuti re rago sovura! Ka mi andu sa ni, ka mi azo ho azo du.

⁵Watadu i zi pa gi ome ka banda tiyo i mángi pa zereda na mi, i mángi pa zereda na mi.”

⁶Ti agu arago nikaye Yakoba arima wa tarã ngua ku sende yo, Yisaraere ambumba ki kusi fogo akpeko, zuzu yo arengba na zegino dunduko.

⁷Ko ta yo wa ko ata agu yo naataka yo? Watadu i imi yo wa i aimi abaimi yo?

⁸Mo naapaa na yo rogo nngbisahe yo, ho mo akedi yo ni ni zizi yo, ko agbisi yo na gako gbegberẽ gugugu yuge rago ye bayuge uroyo

⁹I atúmo ga Yakoba irairapai mbiko gi pai re, gere nga gu zuzuhe nga ga dia gako ingapai ku sa yo: ho ko ka manga ambia ni dunduko nga ga bamotumo ni mbia kuamba nga gu i asuka ha asuka tubutubu, si du aAsera nga angbama na gu duadua ambia ni kpia uru adu nga ho berewe te.

¹⁰Bambiko bakporo nyanyaki ngapa du ni kparakpara ha, kporo sa tihe ni bate mbu yo ho, wa ngbakungba; yo awiri abagara anga tira ni, yo ami apika ni sande a, ka nta akpe ti be agu angua du yo

¹¹Ho agu abehe ka uga ni, i akuadi he; ade ki ye ki ginda we na ni. Mbiko i nga agu aboro adu nga na rugatinapai ti yo ya; si du gu ko namangi yo nungayo adú nga ti ko te, gu ko nambakadi yo ko ayúgo nga inapai fu yo a te.

¹²Ti gu rago re Yekova ataka gako zende ahe tona ti gu di nga Ferata ki da ti gu wiri Di nga ga Ezipeta, na oni, Ako awiri aYisaraere, ono oni i adungura roni ni ba sa sa.

¹³Ti gu rago re, i avuda bakere nambongo, agu yo aye nga agu yo namerẽ ku rogo ringara Asura, na agu yo nadu ni gbandakagbandaka yo ku ringara Ezipeta yo, ka irisa Yekova ri kparakpara ziazia bagangara Yerusarema yo.