Read zande Yesaya 28 Bible Online

Yesaya 28 - zande bible

Yesaya 28

¹Na gberẽ he fu agu yo du na bakere ruka nga akpibuda nga ga Efuraima yo, na fu gu payapaya mbumbuda nga ga gako ngbanya taarimo, nga gu du ti ri gu ngboongboorago idi aida gbe nga ga agu yo kpi imekakue si ki di be yo!

²Mo ngére, Gbia du na iraome be ko nga nyanyaki boro; wa gugugu yuge nga ga morogumba, wa gu bakamikami yuge nagbarasa rago, wa gugugu ime nafu du na baome ti ni, wo ko ka abá he ku auru kpotosende ni be ko

³Gu bakere ruka nga ga abakpibuda nga ga Efuraima yo i asimba ha ku tii ndue yo;

⁴ono gu payapaya mbumbuda nga ga gako ngbanya taarimo, nga gu du ti ri ngboongboorago idi aida gbe, si adú wa bambata zuzu vurumo zu mbata fu faarago: nga gu ho boro mbi he ni ni ki ri he ni ipo wa du he beni.

⁵Ni gu rago re Yekova nga ga arimbasa ko ko adu wa kpakpari bakindo nga ga taarimo, na wa ufongo nga ga betedi he, fu yangara gako aboro;

⁶na wa toro ruru sarangbanga fu gu ni nasunga tipa sarangbanga, na wa ome fu agu yo aria vura ku sa yo ti ngbadimo bakporo.

⁷Ono agi yo re a nandu yangiyangi be imekakue ki nindu andu ngbuongbuo be baripiro; boromotumo na nebi andu yangiyangi be baripiro imekakue sa bangiriyo, i andu ngbuongbuo be baripiro i angera nga wenengaĩ te, i akotoka rogo sarangbanga

⁸Bambiko ambisa hiki dunduko be kina suka, si du a nga ba ho sa zanga biriko te.

⁹“Da ko ka yugo inahe fu ni? na da ko ka raba ni ni rugu tini na pa kedikedi pai? Agu yo mbu mai? agu yo aha nga mai berewe ya?

¹⁰Bambiko si nga ndika ku ri ndika, ndika ku ri ndika, rugute ku ri rugute, rugute ku ri rugute, toni pai erẽ, toni pai yore.”

¹¹Oó, ono aboro kungba iiriwo fugo na ni kungba fugo aboro, Yekova ka agumba pai ni fu agi aboro re,

¹²nga agu yo ko aya fu yo, “Gere nga ongoda; mo fú ongoda fu gu ni mbu; gere nga gu nyakasatise”; ono i akpi nga nyemu ka gia ha te.

¹³Si du ga Yekova pai ka du ti ni fu yo nga ndika ku ri ndika, ndika ku ri ndika, rugute ku ri rugute, rugute ku ri rugute, toni pai erẽ, toni pai yore; ya i ndu, ki tiwi ni giiyo, ki kuadi, i ki re yo ni gbina, ki zi yo

¹⁴Si du oni gí gu pai nga ga Yekova, agu roni napayasi pa aboro, nazoga agi aboro re du Yerusarema yo!

¹⁵Bambiko ya oni, “Ani gba kure na kpio, ani idi pai dagba rani na Baatoro kpikpi aboro; ho gu bakere kpata ka susa ni dagba rani, si ayé nga kono du ani ni te; mbiko ani moi gaani bagbuko rogo zire yo, ani oko tirani rogo pa gumba zire yo a;”

¹⁶si du were poi Gbia MBORI, “Mo ngére, mi moi mbia Siona yo ni mburu he, nga asadiasadi mbia, kikiipa mbia tukpuhe nga ga ndikidi mburuhe: ‘Gu ni idi pa ha ni aípisa nga tini te.’

¹⁷Ono mi asa sarangbanga ni úrugahe, na rurupai ni giri ringbisahe; morogumba awéga gu bagbuko nga ga airazire ku sa yo, aime afu ri baoka yo.”

¹⁸Ono pa gaoni gba kure na kpio si adiga adiga, gaoni idapai dagba roni na Baatoro idapai aboro anyé nga kindi te; ho gu bakere kpata ka susa ni dagba roni, si asimba roni ku sande.

¹⁹Wa si ka asusa dedede dagba roni, si azia roni; mbiko wiso na awiso si asusa dagba roni, uru na ayuru a; ono ka ruga tise na gu pai kedi yo ho, si adú ni pa gbudagbuda.

²⁰Bambiko barame ni guru he arengba nga boro taĩ tini auru he te, na roko dadatise ni umba ha ka boro akaa nga tini na ni ya.

²¹Mbiko Yekova agúari ku an wa ko aguari ri Bagangara Perazima yo, ko adú na zinga wa ko adu rogo ngboongboorago Gibona yo; ya ko mangi gako sunge ― gako iiriwo sunge! gako mangapai da ti rengo ― gako iiriwo mangapai!

²²Si du awere ka oni du nga ni abapayasi aboro ya, giri voda roni ka nyaka; bambiko mi gi pai ngba Gbia MBORI nga ga arimbasa ko, nga pa gbarasa he rogo ringara dunduko.

²³Oni ye turoni ka gia fugore; oni dege turoni ka gia fugore

²⁴Basopobino nasopa bino asopa kindi ka ru he ti ni? ko naasopa gako bino kindi ki kuadi undu sende?

²⁵Ho ko nibukura ha ni wenengaĩ, ko nami nga he du wa vunde ki rũ kumina nga ngbatunga akpepasio te? ki rũ nganu yo ti ringbisiringbisi agenehe, na ngbatunga zende he wa ga mapunga rogo ringbisiringbisi abaha, na kura ngbatunga zende he ni bangbanda ha te?

²⁶Bambiko gako Mbori aruga ko ni ruru he; ki niyugu pai fu ko a.

²⁷Mbiko i ata nga he du wa vunde ni marã ta ahe te, ndu ngbagida andu nga ri kumina te; ono i nata he du wa vunde na ngau, na kumina na ngbondo

²⁸Boro nasa zende ahe? Oó, mbiko ni nata nga ha ata kindi te; ho ni ka ndu ni na gaha ngbagida na gani afarasi auru he, ni nasa nga zende ahe te.

²⁹Gere naye a yo du Yekova ni nga ga arimbasa ko; du ni iiriwo ko rogo rugapai, du ni bahe na tatamana.