Read zande Yesaya 29 Bible Online

Yesaya 29 - zande bible

Yesaya 29

¹Ako Ariere, Ariere, nga gu bakporo Dawidi azi bataya rogo ho! Mo moi garã ku ri kura agarã; apumbo niyé aye ti regboho.

²Mi arungosi Ariere tie, kpe adú yo na nunga, si adú fere wa ga Ariere

³Mi azia bataya pati ro kirikiri, ki zi ro na gamo agbata a mi anyakasa agbata vura kuti ro

⁴Mi azóga ro ku sende yo, mo afura kina sende yo, furaro akura sende yo nvutu yo; fugoro akura sende yo, wa kina ga gu boro gumba sangbaatoro, fugoro akura nvutu yo wa kina patapata.

⁵Ono rimbasa avuraro adu wa kina misimisi nvutu, na rimbasa airakigisa wa gu umu he naya ku sa yo. Si adú ni tunguotunguo pai ti gu rago re,

⁶nga Yekova nga ga arimbasa ko ayé ka bi ro, na woro sumba gumba na bazigizo ti kpotosende na bakere woro he, na bakamikami yuge na gugugu yuge, na gu miráwe narita rago.

⁷Gu rimbasa arikaaboro dunduko naso vura kuti Ariere, i adú wa kina mosumo, wa yuguyugupai yuru nga agu aboro dunduko naso vura kuti ni na kuti gaha nyanyaki agbata ki rungosi he a.

⁸Ono si adu wa ho boro gomoro narara musumo ni ni niri he, ono ni ki zíngi rame yo ka ni ambi nga ya, watadu ho boro gomoro ime narara musumo ni ni nimbiri ime, ono ni ki zíngi rame yo, kina he nimaki ni, ka gani gomoro ime ago nga ya, wo rimbasa arikaaboro ka du dunduko nga agu yo naso vura kuti Bagangara Siona.

⁹Oni sungu ono, ki baki bangironi, oni vurasi bangironi ki du na vurari a! Oni kpi he, ono imekakue te; oni ndú nzokinzoki, ono he baripiro te!

¹⁰Bambiko Yekova uka toro bakere rame ku ri roni, ki kisi bangironi, nga anebi, ko dadi rironi a, nga ababiapai.

¹¹Ono gi yuguyuguapai re dunduko sa tihe fu roni wa agu apai nga ga gu kitabu dika yo ho adika. Aboro ki kusi he fu kina gu boro rengbe na geda pai, niya, “Mi nakpara foro mo gédi gere,” ni ki ya, “Mi arengba nga te, mbiko si ni dikadika ha.”

¹²I kusi gu kitabu re fu gu ni arengba nga na geda pai ya, niya, “Mi nakpara foro, mo gédi gere,” ni ki ya, “Mi aina nga pa geda pai te.”

¹³Gbia ki ya: “Bambiko wa agi aboro nambeda kono du mi ni re, ki niirisi re ni kina ngbayo na ni kpotongbayo a, ono kpotoyo yo ki du ti re tuturu, gayo gunde ti re nga kina gu rugute nga ga aboro i ayugu he ayugo fu yo;

¹⁴si du, mo ngére, mi amánga iiriwo mangaapai berewe dagba agi aboro re, kina iiriwo mangaapai na baiiriwo apai; gu tatamana nga ga gayo tatamana aboro anyása anyasa, na gu rugatinapai nga ga gayo ngangarã aboro adú ni okooko ho.”

¹⁵Na gberẽ he fu agu yo naoka gayo rugapai gbe ti Yekova, nga agu yo du gayo mangaapai kina rogo bitimo, naya, “Da nabi rani? Da ini rani?”

¹⁶Oni sa ri apai kina ku sende! Ka i berẽ pa bameakoro wa pere; ya gu he i amangi he ka aya ti gu ni namangi he, “Ni namangi re te”? watadu gu he i ambakadi he ya ti gu ni nambakadi he, “Rugatinapai ti ni te”?

¹⁷A nga si nga kina ngbutuko rago te, Rebanona asá tihe ni ati idariahe? i ki berẽ pa ati idariahe wa bire?

¹⁸Ti gu rago re airangbianga agia agu apai du kitabu yo, bangiri airavurari abí he bibiri rago yo na ku bitimo yo.

¹⁹Bayee aboro akiisa pa gayo ngba rago rogo Yekova yo, agu rungorungo yo dagba aboro angi rogo ga Yisaraere Ziazia Ko.

²⁰Bambiko i asá airakigisa ni kungba he, abapayasi aboro anyása anyasa, agu yo dunduko naberã pa manga irairapai i aróga yo ku sa yo,

²¹nga agu yo furayo asa aboro ni aboro ngbanga, ki re gbina tipa gu ni naza pai ngbadimo bakporo yo, ki sa gu boro du na ruru ngbanga ku bani na kina kungba fura.

²²Yekova nga gu ko naatumo Abarayama aya tipa ngbatunga Yakoba wẽ: “Yakoba adú nga na zee berewe te, kpakpuko asá nga tihe berewe ni fukpere he a te.

²³Ono ho ko nabi awiriko ni, nga gu mangapai nga ga bere, ko ki du dagba yo, i akpára rimore ni ziazia ha; i akpára ga Yakoba Ziazia Ko ni ziazia ko, ki du na kiki ti ga aYisaraere Mbori.

²⁴Agu yo ingi rogo toroyo yo i ayé ka ruga tiyo na pai, na agu yo nakpakana he i aida pa yugopai.”