Read zande Yesaya 31 Bible Online

Yesaya 31 - zande bible

Yesaya 31

¹Na gberẽ he fu agu yo ndu ku Ezipeta yo tipa undahe, ki kida kuti afarasi, ki nikida kuti angbagidavura bambiko si ni dungu he, na kuti abanduri afarasi bambiko i nga nyanyaki aboro, ono i angéra nga koyo du ga Yisaraere Ziazia Ko ni te, i agbata nga Yekova a te!

²Ono wa du ko ni iratatamana naye na gbigbitapai, ko akaraga nga gako pai ku sa yo te, ono ko azinga kuti amangi gbigbitapai, na kuti abaunda amangi irairapai.

³Ono aEzipeto nga kina aboro, nga Mbori te; gayo afarasi na kina pasio, ono toro te. Ho Yekova ka taã beko ni, agu yo naunda yo i akota akota, gu ni i naunda ni ni ati ati a, i amongo kpiki wa sa.

⁴Bambiko ya Yekova fere wẽ, Wa bahu nagbunga pati gau zizi he na paranga bahu a, ka i vura yamba kina rimbasa ababanda akandoro kuti ru vurũ, u akiga nga ki gunde be ta ngbayo te, u agunde nga be woro yo a te, wo Yekova nga ga arimbasa ko ka zorã ka so vura ri Bagangara Siona yo na ri gaha gangara.

⁵Wa azire nayanga, wo Yekova nga ga arimbasa ko ka banda Yerusarema; ko abánda ha ki batasi he, ko asusa ri he ki nibanda ha.

⁶Ako awiri aYisaraere, oni sa tironi koyo du gu ko ni nga gu ko sa oni mungu kuti ko ki susi

⁷Bambiko ni gu rago re oni dunduko abafa gaoni kpiaahe ku sa yo du ni feda, na gaoni kpiaahe du ni dahabu, nga gu oni amangi he ni beroni tipa roni ni ingapai

⁸“Si du aAsuro akpika be basape, ono ga aboro te; ono basape nikanyasa yo, ga aboro te; i aóra be basape, i amaa gayo aparanga ti sunge wa ga kanga.

⁹Ono gayo mbia aóra ku sa yo be gbudagbuda, gayo abazogo akiga be gu yuguyugupai re,” wo poi Yekova, du gako we Siona yo, na gako gbigiwi Yerusarema yo.