Read zande Yesaya 38 Bible Online

Yesaya 38 - zande bible

Yesaya 38

¹Ti agu arame re Izikiya adu na kaza naandu sa kina kpio. Yesaya ki ye koyo du ko ni nangia nebi nangia wiri Amosa, ki ya fu ko, “Ya Yekova wẽ: Mo rúgu pa kpuro; bambiko mo nikakpi, mo abáta nga te.”

²Si du Izikiya ki sa kpakpuko kuti vuro bambu, ki nikpari fu Yekova,

³ki ya, “Ako Yekova, mi nazungadi ro, mo tíngidi he awere wa mi anata bara bangiro rogo rengo na ziazia kpotore yo, ki nimangi agu apai nangba angba bangiro.” Izikiya ki nikpari akpara gbe ni aume.

⁴Si du sangba Yekova ki ye koyo du Yesaya ni, niya:

⁵“Mo ndú ki ya fu Izikiya, Ya Yekova wẽ, nga ga Dawidi Mbori, nangia titaro: Mi gi ga kpe, mi nibi aumero a; mo ngére, mi akiisa ga rame na agarã 15.

⁶Mi abátasa ro vuru be bakindo aAsuro na gi bakporo re a, mi abánda gi bakporo re.

⁷“Gere adú ni yuguyugupai foro be Yekova, ya Yekova amánga gi pai foro gumba ko ho re:

⁸Mo ngére, mi asá gu kirima uru du ti tanga nga gu naye ku auru kpakpu úringbisa pa saa nga ga Aza, si ki karaga tihe ku sa yo wa dagba ndue bawe.” Si du uru ki karaga tihe ku sa yo wa dagba ndue bawe ti kpakpu úringbisa pa saa si niye ku ri he.

⁹Gu kekeapai nga ga Izikiya bakindo aYudo, ho ko adu ni na kaza, ki hu be gako kaza:

¹⁰Mi aya tigimi, Rogo gi ringbisiringbisi arame mi ka guari erẽ; mi aríma ti angbadimo Baatoro kpikpi aboro tipa yangara gimi agarã dunduko.

¹¹Mi aya, Mi abí nga Yekova, rogo gu ringara nga ga unga aboro te; mi abí nga aboro berewe dagba araki zegino te.

¹²Gi kporo gbisi i tindi he ti re ku sa yo wa kina ga babanda akandoro bamburoko; mi kaĩungare wa kina bamburoko; ko nadia re adia ku sa yo ti útu roko; tona uru da ku yuru mo mbu re;

¹³mi kpari da ku wiso; ko nakua amemere dunduko wa bahu; tona uru da ku yuru mo mbu re.

¹⁴Wa mbirambira watadu zire ime, wo mi napaa, mi auko wa mbipo. Bangire mbu be ngera ku ari yo. Ako Gbia, i namanga re gbegberẽ; mo únda nga re!

¹⁵Mi ayá waĩ? Bambiko ko gumba pai fere, ko mangi he ni tiko. Mi andú rurungbura rogo gimi agarã dunduko bambiko gu nirãnirã pai dũ torore yo.

¹⁶Ako Gbia, aboro du ni ungayo mbiko agi apai re, rogo ho yo dunduko du ungare ni nga ga torore. Ako mo húsi re kpotore wasa ki ungasi re!

¹⁷Mo ngére, si adu tipa gi zereda ya mi adu na bakere nirãnirã pai; ono mo abatasi torore be gu due nga ga zirã, bambiko mo ba gimi ingaapai dunduko ku giiro yo.

¹⁸Bambiko ka Baatoro kpikpi aboro tambua nga ro te, kpio arengba nga ka irisa ro a te; agu yo nazorã ku due yo-arengba nga ka maa bangiriyo tipa ga ndikidi rengo te.

¹⁹Gu unga yo, gu unga yo, i natambua ro, wa mi namanga ha rogo gi uru re; baagude ayúgo pa ina pa ga ndikidi rengo fu awiriyo.

²⁰Yekova ima mbakada tiko ka batasa re, si du ani abí gimi abia ti ni na agu aũworo ahe du na gire, ti agu arame dunduko du ani ni ungarani, rogo ga Yekova bambu yo.

²¹Were Yesaya aya, “I dungura zuzu vurumo ka maa ha ti gu pipihe re ni ngua kaza, ko ahú ahu.”

²²Izikiya aya a, “Gine nga gu yuguyugu pai nikayugo ho fere ya mi andú ku rogo ga Yekova bambu yo?”