Read zande Yesaya 39 Bible Online

Yesaya 39 - zande bible

Yesaya 39

¹Ti gu rago re, Merodaka-baradana wiri Baradana, nangia bakindo aBabero akedi aboro na awaraga na gamahe fu Izikiya, bambiko ko agi he ya ko adu na kaza ki hu.

²Si ki ngba ti Izikiya gbe; ko ki yugu gu bambu nga ga gako wenefuõ ahe fu yo du, na feda, na dahabu, na fuõngua, na kikiipa nzeme, na bambu gako aúvura dunduko, na agu ahe dunduko nadu rogo gako abambuiga kikiipaahe yo. He adu nga dimo kpuko yo sa na rogo gu rago ko azogo ho, nga gu Izikiya ahe yugo ho fu yo te.

³Si du Yesaya nangia nebi ki ye koyo du Bakindo Izikiya ni, ki ya fu ko, “Gini pai gumba agi akumba re foro? Wari ye yo ni kono du mo ni?” Izikiya ki ya, “I niye tuturu rago yo kono du mi ni, boro Babera yo.”

⁴Ko ki ya, “Gini he i nibi dimo kpuro yo?” Izikiya ki karaga ha ki ya, “I nibi agu ahe dunduko du dimo kpure yo; a nga he ho sa dagba gimi kikiipaahe yo mi nihe yugo ho fu yo te.”

⁵Yesaya ki ya fu Izikiya, “Mo gí gu pai nga ga Yekova nga ga arimbasa ko:

⁶Mo ngére, rago nada, ya agu ahe dunduko du dimo kpuro yo, na agu ahe atitaro aigi he ku bambuigaahe yo dati gi uru re, i atínda ha ku Babera yo; wiri he anyé nga ho wa sa te, wo poi Yekova.

⁷Agu awiro nikaenga ti kina ro, nga agu yo mo ka vunga yo, i agá na yo ku sa yo dũ; i asapa yo i du ni airazangada ku bakindo yo nga ga aBabero ko.”

⁸Izikiya ki ya fu Yesaya, “Wenepai nga gu pai gumba mo nga ga Yekova.” Bambiko ko aya tigako, “Zereda adú na rengo ti gimi arame.”