Read zande Yesaya 40 Bible Online

Yesaya 40 - zande bible

Yesaya 40

¹Va gaoni Mbori wẽ, Oni ngárãsi gimi aboro, oni ngárãsi yo.

²Oni fúra na wene fugo fu Yerusarema, ki pe he fu he ya gaha vura nyasi, i vu he ti gaha irairapai si ima bi gu narengbe tipa gaha ingaapai dunduko bara ue be Yekova.

³Fugo boro napaa ngbakungba yo niya: “Oni mbákadi ga Yekova gene, oni rúgu bagene ngbi ngume yo fu gaani Mbori.

⁴I atúmba ngboongbooarago dunduko, i ki zogosi abaagangara azogosa na agangara dunduko; i ki rurugu nuganuga agene ni ruruhe, keteruketeru arago ki du adu kpasakpasa.

⁵Ga Yekova taarimo adú ni kusikusi he, aboro dunduko nikabi he wa sa, bambiko ngba Yekova gumba ha.”

⁶Fugo boro naya, “Mo pói ku ari!” Mi ki ya, “Mi ayá waĩ?” Borose dunduko wa kina nvuo, wene ngbanya ha dunduko wa mbumbuda he ati yo.

⁷Nvuo nita uga, mbumbudaha ki nigboroka, bambiko ga Yekova onga naye ku ri he; aboro wa kina nvuo ni rengo.

⁸Nvuo nita uga, mbumbudaha ki nigboroka; ono gu pai nga ga gaani Mbori si anyé anye kindi.

⁹Ako mo nagumba wene pangbanga fu Siona, mo biti ku ri gbanga bagangara yo; Ako mo nagumba wene pangbanga fu Yerusarema, mo pói ni fugoro ku ari na ome, mo pói ku ari, ka mo gúnde nga ya; mo yá fu agu abaakporo du Yuda yo, “Oni bi gaoni Mbori!”

¹⁰Oni ngére, Gbia nga MBORI naye na tandu apai du, kina beko nikazoga rago fu ko; oni ngére, gako mosoro du be ko, na gako mangapa aboro si bara bangiriko.

¹¹Ko aríga gako rimbasa akandoro wa babandara, ko adúngura wiri akandoro ku beko, ki nitindi ra ti ngbaduko, ki ningbe fu agu ra ku mbata yo ni zera nahaga awira.

¹²Da naaringbisi nga aime ku kpabe ni yo, ki ringbisi angbangbaturũ na pabeni, ki rugu ti ni na pa nvutu kpotosende rogo ũringbisahe yo, ki ringbisi barõa abaagangara ti marã ringbisahe na agangara ti úringbisa barõaahe?

¹³Da naarugu gu Toro nga ga Yekova, watadu naadu ni gako barugupai naayugu pai fu ko?

¹⁴Da ko arugu pai na ni, na da naarugu ko ki yugu gene sarangbanga fu ko, ki yugu inahe fu ko, ki yugu gene rugatinapai fu ko?

¹⁵Oni ngére, arikaaboro wa kina gu he natoga akoro yo, i gedi yo wa kina gu nvutu nye ri úringbisahe yo; oni ngére, ko natumba akisanga ku ari wa kina wiri toni he.

¹⁶Ono Rebanona arengba nga ka gbi wa nyake te, agu anya du yo arengba nga tipa zozo motumo a te.

¹⁷Arikaaboro dunduko, wa kina wiri toni he gbua bara bangiriko, ko gedi pa yo ya i umba ti gu he adu nga ni he ya na ti gu he du ni ku he.

¹⁸Da tie oni ka ringbisa Mbori kuti ni, watadu gini kpiahe oni ka ringbisa ha wa ko?

¹⁹Gu sese kpiahe! bamangisunge azaragasi he, pangu dahabu ki mbedi kpotoho na dahabu, ki mangi azogbo feda tipa ha

²⁰Gu ni rungo arungo ki susi ni nasia gu umba ngua ni tumbatumba gamahe ka zirã nga ya; ni nagbata bangbasia bamangisunge ni se sese kpiaahe nga gu nikawo nga ya.

²¹Oni aina nga ha wo te? Oni agia nga ha wo te? I agumba nga ha fu roni ho rago aenge ni te? Oni aruga nga tironi na ni tona ti maa mburu kpotosende te?

²²Ko nga gu ko nasunga ku ri kirikiri kpotosende, ono araki yo i du wa kina abakirigba; ko nga gu ko nazaraga angbangbaturũ wa kina roko dad ahe, ki gbaragi he wa bamburoko ka ra rogo ho;

²³nasa abazogo ni kungba he, ki sa abasaringbanga auru kpotosende ni kungba he gbua.

²⁴Wa rúku yo he kina awere, ki urugu he a kina awere, tarãha ata rima nga ku sende yo dũ te, ho ko navuda ha ni si ki ugu, gugugu yuge ki ya na ni ku sa yo wa kina nganziri moru.

²⁵Oni aringbisa re tie kuti da, ya mi rengbe na ni sa? wo poi gu Ziazia Ko.

²⁶Oni túka bangironi ku ari yo gbe ka bi nga: da nafu agi ra re? Ko nakusi ra na nmbasara ni gedigedi ra, ko nayamba ra dunduko ti rimora; mbiko gu babakere ome nga ga gako tandu, na mbiko ko nanyaka rogo tandu yo, a nga gu ru sa nakpa te.

²⁷Ako Yakoba, tipagine mo nagu mba ha ti ni were? Ako Yisaraere, mo nape he were tipagine ki ya, “Gi pai dũ ni okooko ho ti Yekova, gi ruru sarangbanga ago bangiri gi Mbori”?

²⁸Mo aina nga ha te? Mo agia nga ha a te? Ya nyenye Mbori nga Yekova, nga Bafu digida kpotosende He amaka nga ko te, ko ambu nga a te, ka i rugu nga tise na pa gako rugatinapai te

²⁹Ko nafu tandu fu gu ni he amaka ni, na gu ni adu nga ome ti ni ya ko nakiisa omeni

³⁰He amáka aparanga, mbugo amánga yo, paranga akumba atiwa atiwa be mbugo ni rengo;

³¹ono agu yo nakida kuti Yekova i aúngasi omeyo, i agúka wa adingimo nagu na apupora, i aóra, ka i ambú nga ya, i atá, ka he amáka nga yo ya.