Read zande Yesaya 41 Bible Online

Yesaya 41 - zande bible

Yesaya 41

¹Ako aringara ti ngba gango baime yo oni óngo kii bara bangire; rikaaboro úngasi omeyo berewe; i yé mbembedi, i ki fura tie; ani mongo yé mbembedi sa sarangbanga.

²Da nawo ti boro uroyo nga gu ni diabese adu fu ni na uru dú? Ko nakusa arikaaboro ku bara bangiriko, ya ko nisimbi abakindo ku tii nduko yo; ko nasa yo wa nvutu na gako basape, i ki du wa yaya nganziri morú be gako mboto.

³Ko nado fuo yo, ki susi yo zezeredi, ngba gu gene ko andu nga mbata ngba ha ya

⁴Da namangi gere ki nyasi he, nayambu arikaaboro tona ho rago aenge ni? Mi nga Yekova, nga bambata ko, mi du nga yangara ko; mi nga Ko.

⁵Aringara ti ngba gango baime yo abi he ki nigunde, digida kpotosende ki nikio; i ye mbembedi ki da

⁶I aunda akurayo ni ba sa sa, aboro ni ba sa sa ki ya fu awirinayo, “Oni ngarãsi tironi!”

⁷Si du basekengua ki ningarãsi pangu dahabu, gu ni nazerengesa kpoto mará ni bande ni ki ningarãsi gu ni namera mará ri nabande, ki nigumba pa zungaha ya, “Ngba ha angba”; i ki banga ha na anen ku ba ha ya ka si wo nga ya.

⁸Ono mo, Yisaraere, gi moyambu, nga Yakoba, gu ko mi asia ko, nga ngbatunga Abarayama nangia wene badiare;

⁹mo mi adi ro ti digida kpotosende, ki yambu ro ti adurugaduruga ha yo, ki ya foro, “Mo nga gi moyambu, mi asia ro mi ambu nga ro te”;

¹⁰ka mo gunde nga ya, mbiko mi du na mo, ka mo kio nga ya, mbiko mi nga ga Mbori; mi anyákasa ro, mi aúnda ro, mi asongoda ro ni kumbabere du na gi rurupai.

¹¹Mo ngére, agu yo dunduko zingi kuti ro adú na zee ki mungo; agu yo nati kangu na mo i adú nga ni he te i akpíka akpika

¹²Mo agbáta agu yo ti kangu na mo, ono mo abi nga yo te; agu yo naso vura kuti ro adú nga ni he wa sa te.

¹³Bambiko mi nga Yekova nga ga Mbori, nazada kumbabero; mi du naya foro, “Ka mo gúnde nga ya, mi aúnda ro.”

¹⁴Ka mo gúnde nga ya, mo Yakoba nga gbiro, na oni nga akumba du Yisaraere yo! Mi aúnda roni, wo poi Yekova; nga gu ko natumo roni nga ga ga Yisaraere Ziazia Ko

¹⁵Oni ngére, mi asá roni wa vovo ti ti mará taahe du na arindihe; oni akuadi abaagangara ki taki he rukutu, oni asá agangara wa umu he;

¹⁶oni apéda ha yuge ki ya na ni ku sa yo, gugugu yuge agbandaka ha. Oni angí rogo Yekova yo; oni asámbua tironi rogo ga Yisaraere Ziazia Ko.

¹⁷Ho rungorungo boro na irazingohe agbata ime ni ka si adu nga ya, goróyo yo ki ugu be gomoro ime, mi nga Yekova akaraga pai fu yo, mi nga Mbori nga ga Yisaraere ko mi ambú nga yo te

¹⁸Mi azá adi ri kungba gbangagba nga arago yo, na agugaabi rogo angboongboorago; mi asá ngbakungba ni munga ime, ugu sende ni ime agugaabi

¹⁹Mi arúka kedara rogo ngbakungba, na agu angua du wa mbegure, na adasi, na aeraya; mi amáa kupuresa ku rogo ngbi ngume, na ngua wa zawa na gu kura ha du wa kupuresa wa sa;

²⁰ya aboro bi he, ki ini he, ki berẽ pa ha ki mongo rugu tiyo na ni, ya be Yekova nimangi gere, ga Yisaraere Ziazia Ko afu he.

²¹Oni kúsi gaoni apai, wo poi Yekova; oni ringbisi gaoni nyanyaki nduapai, wo poi Bakindo nga ga Yakoba ko

²²I ríngbisi pai ni ba sa sa, ki taki pande pa agu apai fu rani nikamanga. Oni táki pande pa gu bambata apai, gine nadu, ya ani berẽ pa ha, ka ina gaha yangara apai; watadu oni yugu gu pai fu rani nikaye.

²³Oni táki pande pa agu apai fu rani nikaye ku mbata yo, ani ini ti ni ya oni nga ambori; oni mángi wenepai, watadu oni mangi gbegberẽ pai, ya ani kio, ki mongo bi he

²⁴Oni ngére, he nga oni te, gaoni sunge nga kina pa kungba pai gbua; kere gbegberẽ boro nga gu ni nasia roni.

²⁵Mi awo ti boro nodiyo, ni ima ye, yo uru nakura ni, ni ayamba rimore; ni asímba abazogo wa i nasi pere, wa agu abameakoro nasimba pere

²⁶Da nataki pande pa ha ho rago aenge ni, ya ani ini he? na mbata fu gure, ya ani ya, “Ko nga ruru boro”? Boro adu nga ho sa napeke paha te, boro adu nga ho sa nayugu paha a te, boro adu nga ho sa nagi gaoni apai a te

²⁷Mi agumba ha mbata fu Siona, mo bí yo, mo bi yo, mi kedi boro fu Yerusarema nga gu ni ye na wene pangbanga

²⁸Ho mi angere ni ka boro adu nga ya; dagba yo yo barugupai yo wa sa te, nga gu ni ho mi ka sana he ni, nikarengba ka karaga pai fere.

²⁹Oni ngére, i dunduko gayo mangapai nga kina ruka na kungbapai gbua; gayo zaragasizaragasi kpiahe du wa kina yuge na kungba he.