Read zande Yesaya 42 Bible Online

Yesaya 42 - zande bible

Yesaya 42

¹Oni bi gi moyambu, nga gu ko songodi mi ko, gimi siasia ko, rago nangba ti mbisimore mbiko ko; mi moi Torore ku riko, ko akúsa ruru sarangbanga fu arikaaboro.

²Ko akpára nga te, ko apaa nga ku ari te, i agia nga fugoko ti gene bakporo a te;

³ko akita nga kamakama nganzi te, ko abisa nga pidapida giri we te; ko akúsa ruru sarangbanga na rengo

⁴Ko ati nga bungudu ki rungbura a te daho ko ka nyakasa ruru sarangbanga ni rogo kpotosende; aringara ti ngba gango baime nasunguda gako rugute.

⁵Ya Mhori nga Yekova we, nga gu ko nafu angbangbaturũ ki zaraga ha, nakparaka kpotosende ku tuturu rago yo na agu ahe nakura rogo ho, nga gu ko nafu onga fu aboro ri kpotosende na toro fu agu yo nata rogo ho

⁶“Mi nga Yekova, mi nayambu ro ni rurupai, mi nazadi bero, ki nibanda ro; ki fu ro fu aboro ni zungahe, ni imarago fu arikaaboro,

⁷ka aza gu bangirise du na vurari, ka kusa kisikisi aboro due kisa yo yo, na agu yo raki bambukisa yo bitimo yo ku zegi.

⁸Mi nga Yekova, gere nga rimore; mi afú nga gi taarimo fu kura boro te, gi tambuahe fu sese kpiahe a te

⁹Oni ngére, agu apai naadu mbata si mangi, vovo apai mi nataka pande pa ha awere; mi nagumba pa ha fu roni mbata si nikakura.”

¹⁰Oni nibi vovo bia fu Yekova, na tambuahe fu ko ti digida kpotosende yo! nga agu roni nandu ku baime yo na agu ahe dunduko du rogo ho, aringara ti ngba gango baime yo na araki rogo ho a

¹¹Ngbakungba na gaha abaakporo tumba fugoho ku ari, na agu akporo Kedara araka rogo ho; araki Sera yo i bi bia ni ngbarago, i ngbiko ri abaagangara yo

¹²I fú taarimo fu Yekova, ki taki pande gako tambuahe rogo aringara ti ngba gango baime yo

¹³Yekova ngbe mbata yo wa iranyaka, ko wo ti gako deringo wa basovura; ko kpari, ii, ko ta ngbako ku ari, ko mangi pai ni bakere ngarã kuti avurako.

¹⁴Mi aongo tipa gbanga rago, mi asungu zaa ki ka ni pare; mi nikakpara awere wa kina gu de naima be gude, mi aónga zorokozoroko ki nigbedi omere a

¹⁵Mi agbarasa abaagangara na agangara, ki ugusi gaha akpepasio nvuo; mi asá adi ni akisanga ki ugudisi amunga.

¹⁶Mi ayé na airavuran ngba gu gene i ama nga ha ya, mi angbé fu yo ku mbata yo ngba gu win agene i aina nga ha a ya. Mi asá bitimo ni imarago mbata yo fu yo, na nuganuga arago ni ruruhe Agi apai dunduko re mi amanga ha, mi ambú nga yo te

¹⁷I akaraga yo ku sa no, i adu na bakere zee, nga agu yo nakida kuti sese kpiahe, naya fu zaragasizaragasi kpiaahe wẽ, “Oni nga gaani ambori.”

¹⁸Oni nga airangbianga, oni gi pai, oni nga airavuran, oni ngere, oni ki bi ahe!

¹⁹Da nga iravuran, nga kina gi moyambu te? da nga irangbianga du wa kina gi bandusunge kedi mi ni te? Da nga iravuran wa gu ni du zezeredi na mi, ni iravuran wa ga Yekova moyambu?

²⁰Oni nabi dungu apai, ono oni akparia nga pa ha te; turoni ni zaza ha, ono oni agia nga pai te

²¹Si angba ti Yekova, mbiko pa gako rurupai, ka taasa pa rugute ka manga ha ni irisiirisi he

²²Ono agi yo re nga agu aboro i atuka ahe be yo ki gbu yo a, i dunduko nga agu yo gbina azi yo ngba ayaro du ni okooko yo ku abambukisa yo; i ye ka du wa ũmozi ka boro adu nga ho sa ka kusa yo ya, i wa ũgbugbu ahe a nga boro sa naya, “Mo káraga yo!” te

²³Da du dagba roni yo nikaye turn sa agi apai re, nikadega tuni ka gia pa gu rago nikaye?

²⁴Da naafu Yakoba ni úghuahe, na Yisaraere ku be abatuka? A nga Yekova namangi he te? ko ani amangi ingapai kuti ko, ka i akpi nga nyemu ka peka fuo gako apai ya, ka i agia nga sangba gako ndika a ya

²⁵Si ko auka gako nzengerenzengere zinga ti ni ku ri ko na gu ome nga ga vura; si ki tigi we kirikiri pati ko, ka ko aruga nga tiko na pa ha ya; si ki zo ko, ka ko aberã nga pa ha kpotoko yo ya.