Read zande Yesaya 45 Bible Online

Yesaya 45 - zande bible

Yesaya 45

¹Ya Yekova wẽ fu gako mbedi mbedi boro nga Kurese, gu ko zadi mi kumbabeko, ko zogo arikaaboro mbata yo fu ko, ka azaka giri dimose nga ga abakindo, ka aza angbadimo mbata yo fu ko a, ka i akisa nga angbadimo bakporo ya:

²“Mi angbé ku mbata yo foro ka yaria tumbatumba arago si du kpasakpasa, mi akúadi angbadimo sirigi rukutu ki kafu angbongbo marã kpa,

³mi afú gu wene ahe nga ga bitimo foro na okooko aukumuko du gbugbu aba yo, ya mo ini ya kina re du, nga Yekova, nga gu ko nayamba ro ti rimoro, nga ga aYisaraere Mbori.

⁴Bambiko mbiko ga Yakoba pai nga gi moyambu, na Yisaraere nga gimi siasia ko, mi yambu ro ti rimoro, mi yambu kura rimoro, ka mo avura nga ina re vurũ ya.

⁵Mi nga Yekova, kura ni ho berewe te, Mbori ho berewe fuo re te; mi ukadi ro na roko, ka mo avura nga ina re vurũ ya,

⁶ya aboro ki ini he, yo uru nakura ni uroyo na ku dioyo, ya a nga kura ni ho fuo re te; mi nga Yekova, kura ni ho berewe fuo re te.

⁷Mi nafu imarago ki mbakadi bitimo, mi nafu zereda ki mbakadi gbegberẽpai, mi nga Yekova, nga gu ko namanga agi apai dunduko re.

⁸“Ako oni angbangbaturũ, oni fú mai ari yo, vuro angbangbaturũ úka rurupai ku sende no; kpotosende sári, ya bata kuru, rurupai kúru mbiko ho a, mi nga Yekova namangi he.

⁹“Na gberẽ he fu gu ni nati kangu na Bamangini, ni wa ngbadi dagba apere yo! Ka pere ya fu gu ni name he, ‘Gini he mo amanga?’ watadu ka gani sunge ya, ‘Be ti ni te’?

¹⁰Na gberẽ he fu gu ni naya fu bani, ‘Gine mo avunga?’ watadu fu nani, ‘Gini he mo aima be he?’”

¹¹Ya Yekova wẽ, nga ga Yisaraere Ziazia Ko, nga Bamangi ko: “Oni sána re tipa agu apai nikaye tipa awire, na tipa gu sunge nga ga bere, oni rúgu re na ni?

¹²Mi namangi kpotosende, ki fu boro ku ri he; kina boro bere nazaraga angbangbaturũ, mi arúgu pa rimbasa ha dunduko.

¹³Mi tumba Kurese ku ari rogo rurupai yo, mi arúga gako apai dunduko rogo ruru he; ko adúa gi bakporo ki mbu gimi bagibagi aboro i ga zezeredi, tipa ngbe yo te tipa mosoro a te,” wo poi Yekova nga ga arimbasa ko.

¹⁴Ya Yekova wẽ: “Gu ũkumuko nga ga Ezipeta ayé foro na gu bagibagi ahe nga ga Etiopia, na aSeba nga gbangagbanga aboro, i ayé fuo ro ki du ni gamo yo, i apéka fuo ro; i ayé ni zizi yo na azogbo; ki tiwi ku sande bara bangiro. I akpára foro, niya: ‘Mbori du na kina mo, kura ni ho berewe te, kura mbori ho fuo ko berewe a te.’ ”

¹⁵Ni rengo, mo nga Mbori naoka tiro aoka, Ako ga Yisaraere Mbori, nga Batasi.

¹⁶I adú na zee ki mungo amungo dú wa du yo dunduko, i amongo ndú ku rogo ruguzuruguzu pai na abamangi kpiaahe.

¹⁷Ono Yekova abátasa aYisaraere abatasa ni nyenye bata; oni adu nga na zee na mungo berewe nye anye kmdi te

¹⁸Bambiko ya Yekova wẽ, nga gu ko namangi angbangbaturũ (ko nga Mbori!), nambakadi kpotosende ki mangi he (ko anyakasi he; ko amanga nga ha ni kungba he te, ko ambakadi he aboro mraki rogo ho!): ko ya “Mi nga Yekova, kura ni ho berewe te.

¹⁹Mi afura nga ni gbuko rogo gu ringara nga ga bitimo te; mi agumba nga ha fu ngbatunga Yakoba ‘Oni gbata re rogo kungba pai,’ te. Mi nga Yekova nagumba rurupai, mi taki pande pa agu apai ru aru.

²⁰“Oni dungura tironi ki ye, oni mbedi mbembedi wa sa, oni nga agu roni naabati dagba arikaaboro! Inahe ti agu yo natinda gayo sese kpiaahe te, nakpara fu gu mbori arengba nga ka batasa boro ya.

²¹Oni taki pande pa gaoni pai ki kusi he; i rúgu pai wa sa! Da nayugu gere bakuru yo? Da nataki pande he mbata? A nga mi nadu, nga Yekova te? A nga kura mbori ho berewe fuo re te, nga irarengo Mbori nga Batasi; kura ni ho fuo re berewe te.

²²“Oni ngere kono du mi ni ka bata, aboro ti digida kpotosende yo du! Bambiko mi nga Mbori, kura ni ho berewe te.

²³Mi zunga he ni tire, gu pai ki kuru ngbare yo rogo rurupai si asa nga tihe te; ‘Ya arukusue dunduko akuka ku bara bangire, mirãse dunduko azunga he ti rimore.’

²⁴“Boro aya tipa re, Kina rogo Yekova yo sa du rurupai ni na ome; aboro aye koyo du ko ni ki du na zee, nga agu yo dunduko zíngi kuti ko.

²⁵Rogo Yekova yo diapai ri ka du ni fu ngbatunga aYisaraere dunduko, na taarimo.”