Read zande Yesaya 48 Bible Online

Yesaya 48 - zande bible

Yesaya 48

¹Ako ngbatunga Yakoba, oni gi gere, nga agu roni i ayambu roni ti rimo Yisaraere, nakuru rogo agu aime yo nga ga Yuda; nazunga he ti rimo Yekova, ki pe pa gu Mbori nga ga aYisaraere ko, ono rogo rengo yo na rurupai te

²I nayamba tiyo ti rimo kparakpara ziazia bakporo, ki kida kuti ga Yisaraere Mbori; rimoko nga Yekova nga ga arimbasa ko.

³“Mi Yekova taki pande pa agu apai naadu mbata tona bakuru yo, si akuru ngbare yo mi ayugu pa ha; mi ki mangi he ni tunguotunguo ho si ki mangi wo

⁴Bambiko mi ini he ya boro nyakari nga mo goro wa gbaga marã, kpanga kpakpuro kĩ wa singi

⁵Si du mi ataki pande paha foro bakuru yo, mbata ragoho mkada mi ayugu he foro, mo ka ya, ‘Gi kpiahe namangi he, na gi sese kpiahe na gi zaragasizaragasi kpiahe narugu he.’

⁶“Mo agi he; awere mo bi agi apai dunduko re; na oni, oni atáka nga pande paha te? Mi yugu vovo apai tona ti gi rago re mo gi he, nga okooko apai nga gu mo ata aina nga paha mbata ya.

⁷I namanga ha kina awere, ono bakuru yo te; ono mbata fu gi uru re mo agia nga paha te, mo ka ya, ‘Oni ngere, mi aini he.’

⁸Mo agia nga ha mbata te, mo aina nga paha mbata a te, turo aza nga ni gu rago bakuru yo te. Bambiko mi aini he ya mo amánga pai ni biriki ki susi, i ki yambu ro nga boro tindika tona ti kina rago batika ro.

⁹“Ono bambiko mbiko rimore mi ambu gi zinga ti ni, mbiko gi tambuahe mi ambu he foro ya mi adia nga ro ku sa yo te

¹⁰Mo ngére, mi furusi ro, ono wa feda te; mi asodi ro ku gbigiwi yo nga ga gberãngbi.

¹¹Mbiko kina gi pai, bambiko kina gi pai, mi namanga ha amanga, mbiko waĩ ka i gbarasi rimore? Mi afú nga gi taarimo fu kura boro te.

¹²“Ako Yakoha, mo dege turo kono du mi ni, na Yisaraere yambu mi ro! Mi nga ko, mi nga bambata ko, mi nga yangara ko a.

¹³Bere namoi mburu kpotosende, kumbabere naazaraga angbangbaturũ; ho mi ayambu he ni, si naru ku ari wa sa.

¹⁴“Oni dúngura tironi, oni dunduko ka gia pai! Gini boro du dagba yo yo nataki pande pa agi apai re? Mi Yekova nakpi nyemu ni; mi amanga gu pai mi akpi nyemu he kuti Babera, ono bere adú kuti aKasado

¹⁵Mi, kina re a, gumba ha, mi yambu ko, mi ye na ko, ko amanga gako pai si ki u au.

¹⁶Oni yé mbembedi kono du mi ni, oni gi gere; ho rago aenge ni mi agumba nga pai ni gbugbu he te, ti gu rago si adu mi adu kina yo.” Awere Gbia MBORI kedi re na gako Toro.

¹⁷Ya Yekova wẽ, nga gu Ko natumo ro, nga ga Yisaraere Ziazia Ko; “Mi nga Yekova ga Mbori, nayugo pai foro sa u, nga gu ko nangbe ku mbata yo foro ngba gu gene mo ka ndu ngba ha.

¹⁸Ako! ka mo adege turo sa gimi arugute! Si du ka ga zereda adu ti ni wa di, na ga rurupai wa ngiri baime;

¹⁹ngbatungaro ki nge a wa ngume; awiro ki nge wa kina rukutu ngume; ka i adia nga rimoro ku sa yo ki gbarasi yo bara bangire wa sa ya.”

²⁰Oni gúari Babera yo, oni óro Kasada yo, oni táki pande pa ha ki ngbiko ni ngbarago, oni gúmba pa ha, ki kedi pa ha dati digida kpotosende yo a; oni yá, “Yekova tumo gako moyambu nga Yakoba!”

²¹Gomoro ime amanga nga yo ho ko angbe ni ku mbata yo fu yo rogo angbi ngume te; ko amangi aime si nikuru ti ambia tipa yo; ko asari mbia a, aime ki gbadi ti ni

²²“Zereda ho te fu gbegberẽ aboro,” wo poi Yekova.