Read zande Yesaya 5 Bible Online

Yesaya 5 - zande bible

Yesaya 5

¹Mi bi bia tipa gu ni du nyemu ni ti re gbe nga bia nyemuse tipa gam ati bakakue: Gu ni du nyemu ni ti re gbe naadu na ati bakakue ri gu gangara idi aida gbe

²Ni asopo ho ki dungura ambia yo, ki rũ siasia giri bakakue yo; ki dua kirikiri gbata bebere he yo, ki ge bapira imekakue yo a, ni ki ningere ya si azu wene nndi bakakue, ono si ki zuku nndi bakakue nga kina ga nvuo.

³Ako agu roni naraka Yerusarema yo na aboro Yuda, mi zungadi roni awere, oni sari ngbanga dagba rani na gi ati bakakue

⁴Gini ka mi amangi he tipa gi ati bakakue nga gu mi ata manga nga ha ya? Tipagine tie ho mi angere ni tipa wene nndi bakakue, si azuku kina rindi bakakue nga ga nvuo?

⁵Awere oni ru nga mi gumba gu pai fu roni mi nikamanga na gi ati bakakue. Mi adía gaha ndugu ku sa yo, si ki du ni zozo ho; mi akúadi gaha ngapa, i ki simbi he.

⁶Mi asá ha ni kurufute; i akúya nga anguaha te, ki sopo ho a te, ono anguruza akura yo na akiwe; mi agúmba pai fu mai ka si ná nga ku ri he ya.

⁷Bambiko gu ati bakakue nga ga Yekova nga ga arimbasa ko si nga ngbatunga aYisaraere, aboro Yuda nga gu giri bakakue ngba bangiriko ki susi; ko angere tipa ruru sarangbanga, ono ko abi kina pa ukakure; tipa rurupai, ono oni ngere, kina kpe rungo ki du!

⁸Na gberẽ he fu agu yo nazunga bambu kuti kura bambu, namaa ati pati kura ati, daho ba ka adu nga ni ya, oni ki mraki kina bebere ngbi yo ni sa roni

⁹Yekova nga ga arimbasa ko zunga he ku ture yo: “Dungu akporo adu ni bate ni rengo, na bakere abambu na abawene he, adú nga na araki rogo ho ya

¹⁰Ringbisiringbisi ati bakakue bawe akúsa zendehe wa aritere 37, na ringbisiringbisi tungahe wa aritere 370 akúsa zendehe wa aritere 37.”

¹¹Na gberẽ he fu agu yo naguan ngbatutu wiso, ki peke fuo baripiro, ki ima ku yuru, daho i akpi imekakue ni!

¹²Akpamngba ki du kporo gayo apumbo yo, na ngbangbari, na nzenze, na nafiri, na imekakue; ono i aberã nga pa ga Yekova mangaapai te, i adua nga bangiriyo ti sabeko a te

¹³Si du i naga na gimi aboro ti ni ni zizi yo bambiko wa i azanga inahe; gayo irisiirisi akumba akefo be gomoro, ngba rimbasa aboro ki niugu be gomoro ime.

¹⁴Si du Baatoro kpikpi aboro nakiisa tihe ti ni ki zara ngbaha zanga nngbisa ha, gayo taarimo na gayo rimbasa aboro, na gayo gbarasapai na gu ni nangi dagba yo, i nazorá ku rogo ho

¹⁵Ga aboro apai napaya, i naumbasi abaakumba, ki payasi gu biapai nga ga airaruka.

¹⁶Ono Yekova nga ga arimbasa ko du ni kiisikiisi pa ko rogo pa sarangbanga, Mbori nga Ziazia ko ko du ni kparakpara ko rogo rurupai yo

¹⁷Awiri akandoro ari a wa ka ami adú bariga anya yo, awiri anya na awiri ameme nze anze ari he kpatakpari yo.

¹⁸Na gberẽ he fu agu yo nagbe irairapai na giri enda, na ingapai wa ka si du na agiri gbe ngbagida,

¹⁹naya: “Ko ípisi tiko, ki ipisi gako sunge, ani ki bi he; sangba ga Yisaraere Ziazia Ko mbédi, si yé, ani ki ini he!”

²⁰Na gberẽ he fu agu yo naya ti gbigbitapai, wenepai, na ti wenepai, gbigbitapai, nasa bitimo ku ba imarago, na imarago ku ba bitimo, namaa hĩhĩhe ku ba nzinzirihe, na nzinzirihe ku ba hĩhihe!

²¹Na gberẽ he fu agu yo du bangiriyo tigayo ni airatatamana naberã ha ya i nga arugutinapai a.

²²Na gberẽ he fu agu yo nanyakasa tiyo ka mbira imekakue, nga nyanyaki akumba tipa koda baripiro,

²³nadia pai ri iragbegberẽ pai mbiko marã mobirimo, ki mgbarasi gu rurupai nga ga boro wenesa!

²⁴Si du, wa mirãwe narita kakarika, wa ugu nvuo nati ku miráwe yo, a wo tarãyo ka adu ni zirĩ ahe, gayo mbumbudahe agunda ku; wa nvutu; bambiko i abasa gu rugute nga ga Yekova nga ga arimbasa ko, ki nipayasi gu pai nga ga ga aYisaraere Ziazia ko

²⁵Si du ga Yekova zmga arungudi ti ni kuti gako aboro, ko ki mtaĩ beko kuti yo ki mtaki yo, agangara ki nikio; kangbayo adu wa zirĩ ahe ngba agene bakporo. Ko asa nga gako zinga mbiko agi apai du te re, ko nataã beko kindi.

²⁶Ko atumba bendere ku ari fu gu rikaaboro du gu ngbi yo, ki niyambu yo ti digida kpotosende yo; oni ngere, i aye ni ngarã ki ípisi tiyo!

²⁷A nga gu ni sa nambu te, a nga gu ni sa nakota dagba yo yo a te, a nga gu ni sa nayukura ki mra a te, giri dimoyo adu nga depedepe wa sa te, giri gayo rakata akata nga wa sa te;

²⁸gayo aguanza du ni tĩti ra, i darĩ gayo mboto, asukutu gayo afarasi ki du wa kina mbia, ndu gayo angbagida ki du wa bakamikami yuge.

²⁹Woro ye yo du wa gbunga bahu, i ki nizirima wa paranga abahu; i gbungu ki zi gayo umozi, ki tindi he ku sa yo, boro adu nga ho ka batasa ha wa sa te.

³⁰I agbúnga ki ri he ni gu rago re, wa woro baime. Ka gu ni ngere ku ringara yo, ni abí bitimo na dungbapai; imarago ki bisi be dubo ngbangbaturũ yo.