Read zande Yesaya 50 Bible Online

Yesaya 50 - zande bible

Yesaya 50

¹Ya Yekova wẽ: “Wari du ga naroni waraga mbutise ni, nga gu mi ambu ri ki fu he? Watadu gini boro du na gi marã be ni mi abagi roni fu ni? Oni ngére, i abagi roni mbiko gaoni irairapai, na mbiko gaoni samungu i ambu naroni ti ni

²Tipagine ti gu rago mi aye, boro adu nga yo te? Ho mi ayambu he ni, boro adu nga ho ka karaga pai wa sa te? I gurusi bere, ka si tumo nga boro wa sa te? Watadu tandu ti re ka batasa boro te? Oni ngére, mbiko gi zahe mi ugudisi baime, mi sa adi ni ugurago; atĩo ho nafũ bambiko ime yo te, ami nakpi be gomoro ime.

³Mi aukadi angbangbaturũ ni bitimo mai, mi sa mbuzaroko ni udada ha.”

⁴Gbia MBORI fu gu mirãse fere wa ga agu yo i ayugu pai fu yo, ya mi ini waĩ ka mi songodi gu ni nambu ni wene fugo. Ko nazingisa re wiso na awiso, ko naza ture sa gia pai wa ga agu yo i ayugu pai fu yo

⁵Gbia MBORI za ture, mi angia nga boro samungu te, mi asa nga tire ku sa yo a te.

⁶Mi asa giire yo fu abataki re, na abagare fu agu yo naadufo maingbare; mi aoka nga kpakpure be zee na suka sure te.

⁷Bambiko Gbia MBORI naunda re; si du mi amungo nga ti ni ya; si du mi asa kpakpure wa mbia we, mi ki ini he ya zee amánga nga re te;

⁸ko du mbembedi nadia pai ri re. Da nikadarã pai na mi? Ani rú ku ari wa sa. Da nga vurare? Ni yé mbembedi kono du mi ni

⁹Oni ngére, Gbia MBORI aúnda re; da nga gu ni nikakita ngbanga re? Oni ngére, i dunduko akpátaka wa kina roko; ayawe arita yo anta dú.

¹⁰Da du dagba roni nagunde ti Yekova? nga gu ni nagia sangba gako moyambu, nata rogo bitimo, ka imarago adu nga fu ni ya, ono ni nakida kuti rimo Yekova, ki songodi tini kuti gam Mbori?

¹¹Oni ngére, agu roni dunduko naginda we, navoda tironi na gburuka we! Oni tá ima gaoni we, na ima agu agburuka we nga gu ginda oni he! Gere adú fu roni be re: nga oni apika kina rogo dungbapai.