Read zande Yesaya 51 Bible Online

Yesaya 51 - zande bible

Yesaya 51

¹“Oni dége turoni kono du mi ni, agu roni napeka fuo rurupai, agu roni nagbata re nga Yekova; oni ngére koyo du gu mbia ni i ade roni ti ni, na ku rogo gu due yo i age roni ni.

²Oni ngére koyo du baroni ni nga Abarayama na koyo du Sara ni navungu roni; bambiko ho ko adu ni ni sa ko mi ayambu ko, mi ki fu maku fu ko ki ngeesi ko

³Bambiko mi Yekova angarása Siona; mi angárása gaha ngbi ugure dunduko, ki mangi gaha angbakungba wa Edene, na gaha ngbi ngume wa gu ati nga ga Yekova; i abi ngbarago na du pusiapusia rogo ho, atambuahe, na woro dodoroma bia.

⁴“Ako gimi aboro, oni dege turoni kono du mi ni, Ako gimi rikaaboro, oni ye turoni kono du mi ni, bambiko mi akusa rugute, mi amanga gi ruru sarangbanga si du ni imarago fu aboro

⁵Gi rurupai du mbembedi, gi bata kuru, bere asara ngbanga aboro; aringara ti ngba gango baime yo nasunguda re, i akida kuti bere.

⁶Oni tuka nga bangironi ku angba ngbaturú yo, ki ngere ku auru kpotosende no; bambiko angbangbaturũ agbandaka ku sa yo wa ngime, kpotosende ki kpataka wa kuru baukadi, agu yo naraka rogo ho akpika wa kina apee; ono gi bata adu nye anye kindi, gi rurupai adiga nga te.

⁷“Oni dege turoni kono du mi ni, agu roni ini rurupai, nga agu aboro du gi rugute kpotoyo yo; ka oni gunde nga be gu gbarasarimo nga ga aboro ya, ka oni kio nga be gayo soapai a ya.

⁸Bambiko ayawe anta yo dú wa kina baukadi, agbirẽ arita yo wa kina tutu mange nya; ono gi rurupai adú nye anye kindi na gi bata adu fu arika ngbatunga aboro dunduko.”

⁹Ako be Yekova; mo zíngi, mo zingisi tiro, mo úkadi tiro na ome, mo zíngi, wa ti agu arago naadu bakuru yo, na wa ti rago agu arika ngbatunga naadu bakuru yo A nga mo nakafu Raba rukutu te? ki rupu gu nya ime du wa kpaka a te

¹⁰A nga mo naaugudisi baime nangia agu aime nga ga baangirimo baaime te? ki mangi abaangirimo baime ni gene tipa gu tumotumo yo, i si rogo ho a te?

¹¹Gu tumotumo yo nga ga Yekova yo akáraga tiyo, ki mye nibi bia ku Siona yo; nyenye ngbarago adú ri yo; i adú pusiapusia na ngbarago ti yo, rungo na kpeukõ agúari ti yo ku sa yo.

¹²“Mi, kina re nga gu ko nangarãsa roni; Ada nga oni ya oni nagunde be boro mkakpí akpi, na be wiri boro nanyasa wa kina nvuo?

¹³Bangironi go ti Yekova, nga Bamangironi, nga gu ko nazaraga angbangbaturũ, ki moi amburu kpotosende Oni ki nigunde na uru dunduko be gu ngariangaria zinga nga ga barungosi roni, ho ko nambakada tiko ni ka gbarasa he. Wari du gu ngariangaria zinga ni nga ga barungosi aboro?

¹⁴I azáka gu bagibagi ni ni ngarã; ni akpi nga ki ndu ku Due yo te, gani kpokuta ati nga bungudu te.

¹⁵Bambiko mi nga Yekova gaoni Mbori, nga gu ko nawo ti baime ngirihe po rimoko nga Yekova nga ga arimbasa ko.

¹⁶Mi moi gi pai ku ngbaroni yo, ki dadi roni ni kirima bere, mi azaraga angbangbaturũ ki moi amburu kpotosende, ki ya fu Siona, ‘Oni nga gimi aboro.’ ”

¹⁷Ako Yerusarema, oni zingisi tironi, oni zingisi tironi, oni ru ku an, agu roni naambiri he be Yekova ti ngba gu inga nga ga gako ngariangaria zinga, naambiri he ti ngba gu bainga ki nyoto ho dũ, nga gu nasa aboro i nindu ngbuongbuo

¹⁸A nga boro sa ka gasa yo dagba awiriyo dunduko nga agu yo i avungu yo Yerusarema yo te; a nga boro ho ka zi yo ti beyo dagba agu awiriyo dunduko i ambu ti yo te

¹⁹Agi apai ue re da ti roni da nunga roni ka du ti ni?― nga gberãngbi na kuadi rago, ngbongi na basape; mi angárãsi roni waĩ?

²⁰Ue maki awironi, i piki ti ri agene bakporo dunduko wa gbodi rogo pio yo; i hi be ga Yekova ngariangaria zinga, na gu zapai nga ga gaoni Mbori.

²¹Si du oni gí gi pai re ti ni awere, agu roni du ni rungosirungosi roni, nakpi he, ono imekakue te:

²²Were poi gaoni Gbia, nga Yekova, nga gaoni Mbori nazungadi he tipa gako aboro; “Oni ngere, mi di gu bainga be roni nasa aboro i nindu ngbuongbuo; gu inga nga ga ngariangaria zinga oni ambira nga he ti ngba ha berewe te;

²³ono mi amáa ha ku be abarungosironi, nga agu yo naaya fu roni, ‘Oni núgadi, ani susi ri roni’; oni asa giironi yo wa sende na wa gene bakporo fu agu yo i susi yo.”