Read zande Yesaya 52 Bible Online

Yesaya 52 - zande bible

Yesaya 52

¹Oni zingi, oni zingisi tironi, Ako Siona oni úkadi tironi na ome; Ako Yerusarema, nga kparakpara ziazia bakporo, oni úkadi gaoni bawene abaukadi; bambiko azangayeratise na birikobiriko aboro ayé nga koyo du oni ni berewe wa sa te.

²Ako Yerusarema, oni zánzia nvutu ti roni, oni gúari ku ari; Ako zizi aboro Siona, oni záki agu agire du gorõroni.

³Bambiko were poi Yekova: “I abagi roni zanga marã, i atumo roni zanga marã a.

⁴Bambiko wo poi Gbia MBORI: Gimi aboro andu mbata ku Ezipeta yo ka sunga yo, aAsuro ki nirungosi yo zanga nduhe

⁵Awere tie, gine mi amanga erẽ, wo poi Yekova, wa i naga na gimi aboro gbua? Agu yo nazoga yo nayora wawa, wo poi Yekova nagbarasa rimore pitipiti na uru

⁶Si du gimi aboro ka ina rimore ti ni, i ama ha rogo gu uru re ya mi nga gu ko nafura; mi du.”

⁷Na ngba ndu gu ko naye na wene pangbanga ri abaagangara yo, nga gu ni nataka pande pa zereda, naye na wene pangbanga wene ahe, nataka pande pa bata a, naya fu Siona, “Ga Mbori nazoga arago.”

⁸Oni gí nga, gaoni ababandarago natumba fugoyo ku ari, i nabi bia ni ngbarago wa sa; mbiko i nangera ka bi apai wa sa, ni gu rago Yekova ka yega ku Siona yo

⁹Oni angbi ugure nga ga Yerusarema oni rikita na ngbarago wa sa; bambiko Yekova ngarãsi gako aboro, ko tumo Yerusarema.

¹⁰Yekova kusi ziazia beko ku bangiri arikaaboro dunduko; digida kpotosende dunduko abi gu bata nga ga gaani Mbori.

¹¹Oni gúari, oni gúari, oni kúru erẽ ku sa yo, ka oni zádi nga birikobiriko he wa sa ya: oni kúru yo, oni gírisi tironi, agu roni natinda ga Yekova aũsunge.

¹²Bambiko oni andú nga ni ipo te, oni aóra nga aora a te, bambiko Yekova angbe ku mbata yo fu roni, ga Yisaraere Mbori adu fuo roni ni babandaroni.

¹³Oni ngére, gi moyambu amánga pai ki u, i akiisa pa ko ki mtaasi rimoko, i amáa ko ku mbata yo gbe

¹⁴Wa dungu aboro akigi mbiko ko― bambiko i agbarasi kpakpuko kia si ki susi ga aboro du, na kpiako a ki susi ga awiri aboro―

¹⁵si du ko ka inwosi dungu arika aboro ti ni; ngba abakindo azera mbiko ko; bambiko i abi gu pai i agumba nga pa ha fu yo mbata ya, i arúga tiyo na gu pai i agia nga ha mbata a ya.